Атырауда мемлекеттік тапсырыс аясында жүзеге асырылып жатқан «Lira» бағдарламасы бойынша жүзуден қалалық ашық біріншілік өтті. 

Жарысқа 2009-2019 жылдары туған 182 жас спортшы қатысып, түрлі қашықтықтарда өзара мықтыны анықтады, деп хабарлайды Өңірлік коммуникациялар қызметі.

Жарыс барысында қатысушылар жас ерекшеліктеріне қарай 25 және 50 метр қашықтықтарда еркін стиль, шалқалап жүзу, брасс және баттерфляй әдістері бойынша сынға түсті. Ашық біріншілік жас спортшылардың дайындық деңгейін бағалап қана қоймай, олардың жарыс тәжірибесін арттыруға мүмкіндік берді.

Ұйымдастырушылардың айтуынша, мұндай жарыстар балалардың спортқа деген қызығушылығын арттырып, олардың кәсіби шеберлігін шыңдауға ықпал етеді. Сонымен қатар жүзу спортымен айналысатын балалар санының артуы өңірдегі бұқаралық спорттың дамуына оң әсерін тигізіп отыр.

— Атыраулық балалардың су спортына қызығушылығы өте жоғары. Қазірдің өзінде жүзу секцияларына қатысушылар саны жыл сайын артып келеді. Алдағы уақытта өңірде екі ірі спорт кешені пайдалануға берілгеннен кейін жүзу секцияларының санын көбейтуді жоспарлап отырмыз. Мұндай жарыстар балалардың деңгейін бақылауға, тәжірибе жинақтауына және шеберлігін арттыруға көмектеседі, — деді жарыс ұйымдастырушысы Ернұр Қойлиев.

Ашық біріншілік қалалық білім беру бөлімінің қолдауымен «Қойлиев», «Ғалымжан» және «Жүзу Нұрсая» жеке кәсіптік ұйымдарының ұйымдастыруымен өтті.

Жарыс қорытындысы бойынша 30-дан астам қатысушы жүлделі орындарға ие болып, түрлі арнайы номинациялар бойынша марапатталды. Жеңімпаздар мен жүлдегерлерге дипломдар мен кубоктар табысталды.

Мамандардың пікірінше, соңғы жылдары Атырауда су спортына қызығушылық айтарлықтай артып келеді. Бұл бағыттағы инфрақұрылымның кеңеюі мен мемлекеттік қолдау болашақта өңірден кәсіби жүзушілердің шығуына мүмкіндік береді.

Елордада дәстүрлі Astana Half Marathon жарысы өтті. Жарыс аясында құрамына 40-қа жуық адам кірген Funduk Team инклюзивті командасының 10 экипажы стартқа шықты, деп хабарлайды қала әкімдігінің ресми сайты.

АҚШ-тың Калифорния штатындағы Лонг-Бич қаласында бразилиялық джиу-джитсудан әлемдегі ең беделді әрі бәсекесі жоғары жарыстардың бірі - Worlds 2026 әлем чемпионаты өтіп жатыр. Бұл турнир жыл сайын әлемнің түкпір-түкпірінен ең мықты спортшыларды жинайды.

Қазақстан өкілі Алинұр Қуатұлы тарихи жетістікке қол жеткізіп, 70 келіге дейінгі салмақтағы қоңыр белбеулілер арасында әлем чемпионы атанды. Бұл жеңіс Қазақстан, Орталық Азия және ТМД елдері тарихындағы аталған санат бойынша Worlds чемпионатындағы алғашқы алтын медаль болды.

Қазақстан құрамасының табысын Сейілхан Болатбек жалғастырып, 76 келіге дейінгі салмақтағы қоңыр белбеулілер арасында алтын медаль жеңіп алды.

Сондай-ақ Батыр Теңізбай 64 келіге дейінгі салмақ дәрежесінде қола жүлдегер атанып, ұлттық құрама қоржынына тағы бір медаль салды.

Осындай деңгейдегі турнирде екі алтын және бір қола медаль жеңіп алу - қазақстандық және жалпы Орталық Азиядағы бразилиялық джиу-джитсу тарихындағы ең айтулы жетістіктердің бірі. Спортшылардың нәтижесі отандық атлеттердің дайындық деңгейінің қарқынды өсіп келе жатқанын көрсетіп, Қазақстанның әлемдік аренадағы беделін одан әрі нығайтты.

Бүгін таңертеңнен бастап Оқушылар сарайында Көкжайлау шатқалында Almaty Superski тау курортын салудың қоршаған ортаға ықтимал әсері туралы есеп бойынша қоғамдық тыңдаулар өтіп жатыр. Іс-шараны жеке меншік Kazakh Tourism Development Ltd. компаниясы ұйымдастырды.

Өскемен қаласында қазақтың ұлттық қолөнерін ұлықтаған тарихи шара өтті. Бұл күні бірден екі жоба халықаралық рекорд ретінде ресми тіркелді. 

22–23 мамыр күндері Атырау қаласында халықаралық «ШеберFEST – 2026» ұлттық қолөнер фестивалі ұйымдастырылады. Іс-шараға Қазақстан өңірлерімен қатар Ресей, Қырғызстан және Өзбекстаннан 100-ге жуық қолөнер шебері қатысады.

Мәдениет және өнер қызметкерлері күніне орай Астанада «Мәдениет және инновация» республикалық форумы басталды. Іс-шараға еліміздің барлық өңірінен мәдениет ұйымдарының өкілдері, халықаралық сарапшылар, бизнес қауымдастық мүшелері, креативті индустрия және технологиялық компаниялардың мамандары жиналды.

Атырау облысы Дене шынықтыру, спорт және туризм басқармасының қолдауымен, Жеңіл атлетика федерациясы және Atyrau Marathon ұйымдастырушыларымен дәстүрлі «Atyrau Marathon – 2026» жеңіл атлетикалық марафоны жоғары деңгейде ұйымдастырылды.

 2026 жылғы 15 мамыр күні Атырау қаласындағы орталық ФОК спорт кешенінде 2010-2011 және 2013-2014 жылы туған жасөспірімдер арасында дзюдодан «ABU OPEN CUP» Республикалық ашық турнирінің салтанатты ашылу рәсімі өтті.

Дәстүрлі жарыстың басты мақсаты – жас спортшылар арасында дзюдо спортын дамыту, салауатты өмір салтын насихаттау, өскелең ұрпақты отансүйгіштікке тәрбиелеу және спорт арқылы ел намысын қорғауға баулу. Биылғы турнирге еліміздің әр өңірінен және Атырау облысының аудан-қалаларынан жалпы саны 320 спортшы қатысуда. Атап айтқанда, Ақтөбе, Маңғыстау, Батыс Қазақстан, Қызылорда облыстары мен Шымкент қаласынан, сондай-ақ Жылыой, Индер, Исатай, Мақат, Құрманғазы, Махамбет, Қызылқоға аудандары және Атырау қаласынан келген жас балуандар бақ сынауда. Салтанатты шараға:

— Атырау облысы әкімінің орынбасары Қайрат Талапұлы Нұртаев,

— Атырау облысы дене шынықтыру, спорт және туризм басқармасының басшысы Нұрбол Тұрарұлы Сыдықов,

— Қазақстан Республикасының Еңбек сіңірген жаттықтырушылары Мәлік Екпіндіұлы Сүлейменов пен Марат Сәуенұлы Әбдуәлі арнайы қатысты.

Шара барысында спорт жанашырларына құрмет көрсетіліп, дәстүрлі марапаттау рәсімі ұйымдастырылды. Ашылу салтанаты патриоттық рухтағы әндермен жалғасып, қатысушыларға сәттілік тілектері айтылды. Айта кетейік, жарыстың алғашқы күні 2010-2011 жылы туған жасөспірімдер татамиге шықса, 16 мамыр күні 2013-2014 жылғы спортшылар өзара мықтыны анықтайды.

Мүмкіндіктері шектеулі болса да тұрғыластарынан қалмай спортпен шұғылдану қайсар жандардың өмірге деген құлшыныстарын көрсетеді. Әр параспортшының ерік-жігері, жаттықтырушыларының еселі еңбегі мен мемлекеттік қолдау жеке тұлғаның емес, бүкіл қоғамның жеңісі.