Бүгінде әлеуметтік масылдық пиғылынан арылу ауқымды мәселеге айналып отыр. Мемлекет басшысы Қасым-Жомарт Тоқаев «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында әлеуметтік міндеттемелерді қаржыландыру ісінде өңірлердің ахуалын қайта таразылау қажеттігін ескертті.

Мынаған баса мән берген жөн. Бұдан былай да мемлекет тарапынан әлеуметтік көмек көрсету, қамқорлық таныту жалғасын таба береді. Айталық, биылғы сегіз айдың ішінде көпбалалы отбасыларға, марапатталған аналарға берілетін мемлекеттік жәрдемақы аударуға 354,5 млрд теңге жұмсалған. Яғни 856,2 мың отбасы, оның ішінде: көпбалалы 613,4 мың отбасына 308,9 млрд теңге, наградталған аналарға (242,8 мың адам) 45,6 млрд теңге берілді.

Елімізде көпбалалы от­ба­сыға берілетін мемлекеттік жәр­демақыға төрт, одан да көп бірге тұратын кәмелетке толмаған немесе 23 жасқа дейінгі күндізгі бөлімде оқитын студент балалары бар отбасылар табысына қарамастан үміткер бола алады. Биылғы қаңтар айынан бері төрт баласы бар отбасына 16,03 айлық есептік көрсеткіш мөлшерінде (АЕК) 63 030 теңгеден төленіп келеді. Бес балалы отбасына – 20,04 АЕК (78 798 теңге), алты балаға 24,05 АЕК (94 565 теңге), жеті балаға 28,06 АЕК (110 332 теңге) беріледі. Бұған қоса «Күміс алқа» иегері ретінде 25 165 теңге көлемінде ай сайын жәрдемақы төленеді. Сондай-ақ «Алтын алқа», «Батыр Ана» атағын алған, І, ІІ дәрежелі «Ана даңқы» ордендерімен марапатталған аналарға 29 097 теңге (7,40 АЕК) беріледі. Сегіз, одан да көп баласы бар отбасыларға әр балаға 4 АЕК мөлшерінде мемлекеттік жәрдемақы аударылады. Осы жылдың 1 қаңтарынан бас­тап көпбалалы отбасыларға тағайын­далатын мемлекеттік жәрдемақылардың мөлшері 6,5 %-ға артты.

Биылғы Жолдауда халықтың осал тобына әлеуметтік көмек, қолдау әрдайым көрсетілетіні атап өтілді. Дегенмен шын мұқтаждардың арасында «жолын тапқандардың» да еніп кетуіне бейжай қарамау керек. Президент әлеуметтік көмек көрсету тетігін қайта пысықтау қажеттігін тапсыра келіп: «Жүргенге жөргем ілінеді» деген қағидатты енгі­зіп, өңірлердің әлеуметтік мін­дет­темелерін қаржыландыру мәселесін қайта қараған жөн. Сонымен қатар аймақтардағы әлеуметтік тұрғыдан осал топтағы азамат­тарға бөлінетін әлеуметтік төлемдерді біріздендіру керек. Мемлекеттің көз алдындағыдан басқаны көрмей, бәріне көне беретін әлеуметтік саясаты жүзден астам түрлі жеңілдіктің пайда болуына әкеп соқтырды. Осы жеңілдіктерді әперемін деп «көмек қолын» созатын жылпостар да көбейді», деді.

Мемлекет өз халқына әлеу­меттік саладағы міндеттерін орындаудан бас тартпайды. Тек бір ізге түсіп, жүйелі жос­пармен жүзеге асырылуға тиіс. Кезінде  әлеуметтік салаға жауаптылар толық емес отбасы мүшелерін де жеңілдікке мұқтаждар санатына қосты. Мұның салдары елде ажырасудың артуына әкеліп соқты. Бүгінде еліміз – дәм-тұзы жарас­пай айырылысқандардың статистикасы жөнінен әлемде алдыңғы қатарда. Ұлттық статис­тика бюросының мәліметінше, былтыр АХАТ органдарында 123,6 мың неке тіркелген. 2023 жылмен салыстырғанда некелесу көрсеткіші 2,2%-ға артқан. Бірақ ажырасу көп. Өткен жылы 40,5 мың отбасы ажырасқан. Бұл дегеніміз шаңырақ құрған әрбір үшінші отбасының шаңырағына сызат түскенін аңғартады. Әсіресе қалалық жерде неке бұзу дерегі жиі тіркелген. Өкініштісі, жас­тар арасында ажырасу артпаса, кемімей тұр. Мемлекеттен берілетін түрлі әлеуметтік көмек, төмендетілген пайызбен тұрғын үй ипотекалық бағдарламасына қатысу үшін де «ажырасатындар» бар.

Мемлекет басшысы Жол­дауында жалқаулық түбі жарға жы­ғатынын да атап өтті. «Біз өзі­міз жалқаулық пен масылдыққа жол беріп отырмыз. Отбасы мүшелерінің барлығы дерлік ны­саналы әлеуметтік көмек пен жәрдемақы алатын болса, жұмыс істеудің не қажеті бар? Турасын айтсақ, әлеуметтік салада оңтайлы шешім қабылдаудың орнына, Үкімет кемінде 15 жыл бойы әлеуметтік масылдық пен әлеуметтік алаяқтыққа жол беріп келді», деп  қынжылыс білдірді.

Отбасының табысын көле­гейлеп, мал-мүлкін жасырып, қаржылық кіріс көзін азайту арқылы әлеуметтік төлем алу­­­шы­лардың қатарына енуді көз­­­дейтіндер көбейіп барады. Әлеуметтанушы мамандар «Жат жарылқамаса да, өз елім өлтір­мейді» деген психологияға арқа сүйеу бақуатты ғұмыр кешудің көрінісі еместігін айтады. Көпба­лалы отбасыларға берілетін, яғни әрбір перзентіне есептеліп аударылатын жәрдемақы мен әлеуметтік төлемнен артық табыс табуға ұмтылмайтын жандар бар. Мұның ақыры әлеуметтік масылдыққа әкеліп ұрындырады.

Әлеуметтанушылар кеңестік дәуірдің психологиясын бойына сіңіріп алған жандар «мемлекет бізді асырауға міндетті, әрдайым қамқорлық көрсетуге тиіс» деген түсінікке арқа сүйейтінін алға тартады. Бүгінде мемлекеттің қолдауымен ғана әрекет етіп, қаржылық мәселесін шешуде өздігінен жол табуға ұмтылмайтын кейбір кәсіпкерлер де бар. Олар тек қазынадан қолдау қаржысын алсам болды деген пиғылмен шаруасын дөңгелетеді. Мемлекетке игілігін көрсетуге келгенде сараңдық танытады. 

Әлеуметтік масылдықтың өршуіне бос жұмыс орындарына орналасуға «екі қолға бір күрек» таппай жүрген жандардың құлықсыздығы әсер етеді. Ай сайынғы еңбекақы мөлшері аз деген желеумен жұмыстан бас тартып, тек әлеуметтік төлемдер мен көпбалалы отбасына беріле­тін жәрдемақымен күнелтуді қош көреді. Айлық еңбекақы мөлшерінің аздығын сылтау етіп, еңбектенуге құлық­сыздық танытуға қатысты бір мысал. Биыл жазда біздің ауылда іргелі шаруашылық иесі мая-мая шөпті көліктен түсіріп, жинап беруге ауыл тұрғындарын шақырды. Бірақ жұмыс иесінің ұсынған қаржы мөлшерін қомсынған тұрғындар бас тартты. Ал көрші ауылдан келген төрт-бес жігіт жарты күннің ішінде буылған шөпті көліктен түсіріп, жинап беріп, еңбекақысын алып кетті. Төлейтін соманы азырқанған ауылдағы жұмыссыз жастар осылай несібеден қағылды. Мұндай мысалдар жетіп артылады.

Мемлекеттің әлеуметтік міндеттерінің бастауында отбасына қорған болу, ана мен балаға қамқорлық таныту тұрған­дықтан да масылдық психологиясы артты. Жастардың ажырасу көрсеткішінің күрт артуына әлеуметтік жеңілдік­пен, мемлекеттік бағдарлама аясында пәтер алу да «септігін тигізгені» анық. Мысалы, жас отбасыларға мемлекеттік бағдарламамен, ипотекаға рәсімдеп пәтер беру бағдарламалары бар. Бұрын жас отбасылардың шектік жас мөлшері 29 жасқа дейін болса, бертінде 35 жасқа ұзартылды. Мұның өзі кейбір азаматтарға аздық ететін көрінеді. Тұрғын үй бағдарламасына өтініш жазғанда отбасындағы ерлі-зайыптының да жас мөлшері 35-тен аспауға тиіс. Тығырықтан шығудың бір «айласы» – ажырасу. Мәселен, жас отбасы мәртебесі арқылы мемлекеттен пәтер алуға ұмтылған отбасында күйеуінің жасы 36-да болуы мүмкін. Ал әйелі – 31-де. Содан заңдық негізде ажырасуға арыз жазып, әйел толық емес отбасы есебінде тұрғын үй кезегіне тұрады. Сайып келгенде, бұл схема да әлеуметтік масылдық белгісін аңғартады.

Президент жанындағы Қа­зақстанның стратегиялық зерттеулер институтының ғылыми хатшысы Айгүл Көшербаева қоғамдық сана «алма піс, аузыма түс» дейтін жалқаулық ұғымынан тазарғанда ғана көзқарас өзгеретінін алға тартады.

«Әлеуметтік масылдық – ең­бекке қабілетті азаматтардың мемлекет тарапынан берілетін көмекке тәуелді болып, еңбек етуге ұмтылмау жағдайы. Мұндай үрдіс ұзақмерзімді келешекте ел экономикасына да, әлеуметтік жүйеге де кері әсерін тигізуі мүмкін. Биылғы Жолдауында Президент әлеуметтік төлемдер мен жеңілдіктерді цифрландыру, орталықтандыру, оңтайландыру қажеттігін атап өтті. Бұл көмекті нақты мұқтаж жандарға бағыттап, артық, қайталанатын төлемдерді болдырмауға жол ашады. Халық­аралық тәжірибе мұндай тәсіл­дің тиімділігін көрсетіп отыр. Мы­салы, Германияда әлеуметтік көмек тек еңбекпен қамту бағдар­ламаларына қатысқан, қайта даярлаудан өткен немесе жұмыс іздеп жүрген азаматтарға ғана беріледі. Швецияда да осыған ұқсас тәсіл бар: әлеуметтік көмек еңбекке белсенді қатысумен қатар жүреді. Бізде де мемлекеттің қолдау шаралары мен еңбекке белсенділік қатар өрбуі қажет. Елімізде осы бағытта нақты қадамдар жа­са­лып жатыр», деді сарапшы.

Он екі мүшесі сау азаматтың еңбек етуге ықылас танытпай, мемлекетке міндет артуы тоқ­тамай, масылдық психология­дан арылмайтынымыз анық. Сон­дық­тан бұл кеселді жаппай айыптап, ел болып күрескенде ғана жеңе аламыз.  

Премьер-министрдің орынбасары Ермек Көшербаев орталық мемлекеттік органдар мен өңір­лердің өкілдерімен кеңес өткіз­ді. Кездесу барысында туризм­­­­­­ мәселелері мен туристік аймақ­тардың жағдайы бойынша Президенттің тапсырмасын жүзеге асыру туралы есептер тыңдалды. Сонымен қатар елдің негізгі туристік дестинацияларына жасалған іссапарлардың нәти­­­же­сі ұсынылды.

Ермек Көшербаев қабыл­данып жатқан шаралардың жет­кі­ліксіз екенін атап өтіп, инфра­­құрылымды дамыту мен туристік нысандардағы көрсе­­­­ті­летін қыз­меттердің сапасын арттыру жұмысын жеделдетудің маңыздылығын ерекше көрсетті. Мемлекет басшысының жаңа тапсырмаларын ескере отырып, алдағы жазғы маусымға курорттық аймақтарды даярлауға баса назар аударылды.

«Туризмді дамыту – бұл тек қана экономикалық үлес емес, сонымен қатар елдің халықаралық имиджін нығайтудың, инвес­тициялық тартымдылығын арт­тырудың және өңірлерді дамы­тудың маңызды факторы. Осы мақсаттарға қол жеткізу үшін заманауи инфрақұрылым салумен қатар, әлемдік озық тәжірибелерге сәйкес келетін жоғары сервис стандарттарын қалыптастыру қажет», деді Премьер-министрдің орынбасары.

Үкімет туризмді ұлттық эко­но­миканың негізгі драй­вер­ле­рі­нің бірі ретінде қарастырады. Маңызды шарт ретінде шағын және орта бизнестің белсенді қатысуы, сондай-ақ отандық және шетелдік туристерге қызмет көрсету ісіне халықтың кең ауқымын тарту қажеттілігі аталды.

Жиын қорытындысы бо­­йынша мемлекеттік органдарға курорттық аймақтардың абаттандыру стандарттары мен турис­­тердің қауіпсіздігін қам­­тамасыз ету, шетелдік қонақтарға паспорттық бақылау рәсімдерін жеңіл­дету, сұранысқа ие әуе бағыт­тарына халықаралық лоукос­терлерді тарту, сондай-ақ турис­тік қыз­меттердің сапасын арттыруға бағытталған бірқатар басқа да шараларды жүзеге асыру тапсырылды.

– Ұстаздардың жасанды интеллек­­­ті­ні меңгеру дағдысын қалыптастыру, оны сабаққа кірік­­тіру қай деңгейде?

Қаныбек ЖҰМАШЕВ:

– Жаңа оқу жылының басында 400 мыңға жуық педагог орта білім беру жүйесінде жасанды интеллект бойынша дайындықтан өтеді. Біз жасанды интеллектіні сабаққа енгізгелі отырмыз. Біріншіден, бастауыш сыныптарда «Цифрлық сауаттылық» деген пән бар. Ал 5-сыныптан бастап «Информатика» пәні оқытылады. Енді осы екі пәнге жасанды интеллектіге қатысты бағдар­ламалар енгізіледі. Осы арқылы оқушылар негізгі түсініктерді меңгереді. Сонымен қатар әрбір мұғалім өз пәнінде жасанды интеллектіні қолдана бастайды. Бұл жобаның тиімділігін арттыру үшін әрі қажет болған жағдайда түзетулер енгі­зіп отыру мақсатында қанатқақты жоба жүргізуді қолға алдық. Оған Астана қаласының мектептері, 217 «Келешек мектебі» тартылады. Жалпы, 380 мыңнан астам оқушы және 22 мыңнан астам мұғалім қатысады. Осылайша, бірін­ші жартыжылдықта, қаңтар айы­на дейін, белгіленген мектептерде жасанды интеллектіні енгізу басталып кетеді. Кейін қосымша эксперименттің аралық нәтижелерін ескере отырып, қаңтар-ақпан айларында қамтылатын оқушылар мен мектептердің санын біртіндеп арттыруды жоспарлап отырмыз. Қазіргі балалардың техникаға бейімділігі жоғары. Олар туғаннан әлеуметтік желіні де, телефонды да, техниканың тілін де тез меңгереді. Сондықтан бұны қабылдап әкететіні сөзсіз. Дегенмен бізде мемлекеттік білім стандарты бар. Сон­дық­тан оқу барысына кез келген жаңа құралды енгізу оңай емес, ол үшін жан-жақты тексеру қажет. Алдымен сынақ кезеңін аяқтап, содан кейін ғана енгіземіз. Егер қажетті ақпа­ратты балаларға ыңғайлы әдіспен жеткізетін болсақ, білім сапасын арттыруға ықпал етеді.

Нәзипа АЮБАЕВА:

– Ы.Алтынсарин атындағы ұлттық білім академиясы ЖИ қолдану бойын­ша этикалық стандарттар мен ака­­­де­мия­лық адалдық ережелерін дайындады. Сонымен қатар академия ұжымы ЖИ-ді этикалық қолдану жөніндегі нұс­қаулық әзірледі. Бұл – техникалық нұсқаулық емес, мұғалім қызметіне пайдалы құндылықтар жинақталған құжат. «Мұғалім – оқушыға ЖИ-ді сауатты пайдалануды үйрететін жетекші тұлға» деген қағидат сақталады.

Биылғы оқу жылында мектептегі «Цифрлық сауаттылық» және «Инфор­матика» пәндеріне жасанды интеллект негіз­де­ріне арналған тақы­рып­тар енді. Осы тұста айта кетерлігі, мектеп бағ­дар­ламасына жасанды интеллект жеке оқу пәні ретінде емес, жаратылыстану-мате­­ма­тикалық бағыттағы пән­дер мен қоғамдық-гумани­тар­­лық бағыт­тағы пәндер маз­мұ­нына кіріктіріліп енгізіліп жатыр.

Бастауыш сынып білім алушылары ЖИ туралы қарапайым түсініктер, қауіпсіздік ережелері, этикалық нормалар тура­лы білімді «Цифрлық сауат­ты­лық» оқу пәні арқылы меңгереді. Ал негізгі және жоғары сыныптарда ЖИ тура­лы білім «Информатика» пәнінде оқытылады. Аталған пәндегі алгоритм­дер, деректерді өңдеу, машиналық оқыту негіздері сынды тақырыптарын оқытуда білім алушылар ЖИ-ді қолдану құзыретін игереді. Сонымен қатар орта білім беру ұйымдарына «Day of AI» сияқты ашық әдістемелік ке­шендер қолданылып, да­йын сценарийлер, тапсырмалар және жобалар ұсынылады. Бұл оқу материал­­дары үнемі жаңартылып отырады. ЖИ орта білім беру жүйесіне оқу пән­дері мазмұнына кезең-кезеңмен және білім алушылардың жас ерекшеліктеріне қарай енгізіледі.

Анар ТӨЛЕУБАЕВА:

– Бұл – осы күннің ең өзекті мәселе­ле­рінің бірі. Біз балаларды ерте дамы­ту институтымен бірлесіп, тәр­бие­­ші­лерді, мұғалімдерді, әдіскерлерді жасанды интеллект құралдарымен жұмыс істеуге үйрету бойынша курстар өткіздік. Қызығы, қатысушылардың көпшілігі – орта жастағы, 45–50-дегі әйелдер болды. Кейбірі қарапайым электрондық поштаның құпиясөзін де есте сақтай алмайтын адамдар. Соған қарамастан, біз оларды «ChatGPT» жүйесіне тіркеп, промпт жазуды үйреттік. Нәтижесінде, олар жасанды интеллектінің көмегімен сабақ жоспарларын дайындап, тәрбиелік іс-шараларға арналған сценарийлер құрастыра алатын деңгейге жетті.

Бұл тәжірибе бізге мына нәрсені дәлелдеді: егер дұрыс бағыт-бағдар беріл­се, мұғалімдердің жас ерекшелігіне қарамастан, жаңа технологияға бейім­делу қабілеті жоғары. Жас буын ұстаздар ЖИ-ді жылдам қабылдаса, орта буын мұқият үйренеді, ал үлкен буын алғаш­қыда сенімсіздік танытқанымен, уақыт өте келе олар да пайдасын көреді. Мұның бәрі педагогтердің кәсіби құзыреттілігін арттыруға жол ашады. Демек ЖИ – ұстаздың орнын басатын құрал емес, керісінше, оның жұмысын жеңілдетіп, шығармашылыққа көбірек уақыт бөлуіне жағдай жасайтын серіктес. Болашақта мұғалімнің кәсіби дағдылары қатарында жасанды интеллектімен жұмыс істеу қабілеті негізгі талаптардың біріне айналары сөзсіз.

– Университетте жасанды интеллект мамандарын даярлау үдерісі қалай жүріп жатыр?

Бибігүл РАЗАХОВА:

– Жоғары оқу орындарында жасанды интеллект саласына маман даярлау  мемлекет үшін стратегиялық маңызға ие. Бұл үдеріс тех­ни­калық білім­мен ғана шек­­­телмей, пәнаралық бағыт­­­­та жүзеге асыры­­­­лып жатыр. Университеттерде ЖИ мамандарын даярлау бакалавриат, магистратура, PhD деңгейлерінде жүргізіледі. Әр деңгейде күрделілік пен бағыт ерек­шелігі еске­рі­леді. Білім беру бағ­дар­­­ламаларында Маши­на­лық оқы­ту, Компьютерлік көру, Білімді бей­­нелеу модел­ьдері, Нейро желілер, Терең оқыту, Табиғи тілді өңдеу сынды модульдер қарастырылған.

ЖИ тек ақпараттық технологиялар бағы­тындағы факультеттермен шек­тел­­мейді. Университеттерде гумани­тар­лық, әлеуметтік, экономикалық және жаратылыстану салаларына арналған ЖИ курстары енгізіле бастады. ЖИ курс­тары үшін арнайы лабораториялар, білім беру деректер базасы, сондай-ақ оқытушылардың біліктілігін арттыру курстары ұйымдастырылады. Қазақстан мен Қытай арасындағы ынтымақтастық нәтижесінде Еуразия ұлттық универ­ситетінде «Лу Бань шеберханасы» ашылды. Мұндай шеберхананың ашылуы студенттерімізге Қытайдың заманауи жабдықтарын пайдалана отырып, жасанды интеллект бойынша тәжірибеге бағытталған курстарды игеруге жол ашты. Сондай-ақ зерттеу топтары мен докторанттар ЖИ және өнеркәсіптік технологиялар саласындағы гранттық тақырыптарды қамтитын ғылыми-зерттеу жұмыстарын орындауға пайдаланады. ЖИ білімін университеттен бастау жеткіліксіз. Сондықтан «Мектеп-колледж-ЖОО» тізбегін қалыптастыру үшін мектеп оқушыларына арналған ЖИ негіздері пәнін дайындап, колледждермен байланыс орнату қажет.

– Жасанды интеллектіні білім сала­сына енгізгенде, ең алдымен қан­дай этикалық және әдістемелік мәсе­ле­лер­ге назар аудару керек?

Анар ТӨЛЕУБАЕВА:

– Жасанды интел­лек­тіні мектеп бағдар­­ла­ма­сына ен­гі­зу – қажет­ті­лік. Ең бастысы, оны қалай пайдаланамыз? Бұл жерде тепе-теңдік сақталуы керек. ЖИ баланы дайын білімге үйретіп қоймай, оның ізденісін арттыруға да септігін тигізуі қажет. Сондық­­­тан әр қадам ұлт­тық регламентпен, нақты ережелермен бекі­тілуге тиіс.

Елімізде ЖИ-ді қол­данудың құқықтық негіз­дері жасалса, мұғалімдер мен ата-аналардың сенімі артады. Қауіпсіздік – тек техникалық жағынан ғана емес, этикалық тұрғыдан да маңызды. Баланың жеке деректерін қорғау, тапсырмалардың әділ орындалуын қадағалау, білімді баға­лау­да ашықтық сақтау – басты талап.

Осы тұрғыда мектеп бағдарламасына тек ЖИ-ді пайдалану емес, сыни ойлау мен цифрлық сауаттылық модульдерін енгізу аса қажет. Балаларға «қалай қол­да­ну­ды» ғана емес, «неге толық сенуге болмайтынын» да түсіндіру керек. Өйткені технологияға тәуелділік білімнің сапасына кері әсер етуі мүмкін. ЖИ оқушының ақыл-ойын алмастыратын емес, оны дамы­туға көмектесетін құрал ретінде қол­­да­нылғанда ғана шынайы нәтиже бере­ді.

Бибігүл РАЗАХОВА:

– Жасанды интеллектіні білім беру саласына енгізгенде жеке деректердің құпиялылығы, авторлық құқық және заңсыз пайдаланудың алдын алу, гене­ративті ЖИ қолданудың этикалық аспек­тілеріне назар аударуымыз керек. ЖИ оқытушыны алмастырмайды, тек кө­мекші құрал. Шешім қабылдау жауап­кершілігі адамның қолында қалуы керек.

Жасанды интеллектіні білім беру саласына енгізгенде келесі әдістемелік мәсе­лелерге назар аударсақ деймін. Ең алдымен, ЖИ негіздері пәнін кезең-кезеңмен енгізу қажет. Одан соң, оқыту­шы­лардың жасанды интеллект технологиясын меңгеру дағдысын қалыптастыру керек. Сонымен қатар оқыту форматы мен ресурстарды әзірлеп, қашықтан оқыту мен офлайн оқытудың үйлесімін ескерген жөн. Тағы бір айта кетерлігі, қазақ тіліндегі ЖИ оқулығы мен оқу-әдіс­темелік құралдарды дайындауымыз қажет.

– «Qazaq Digital Mektebi»-нің басты артықшылығы қандай?

Нәзипа АЮБАЕВА:

– Ел Президенті Жолдауда атап өткен­дей, «Qazaq Digital Mektebi» – қашық­тан оқыту мен жасанды интеллект технологиясына негізделген жоба.Жоба мақсаты – ЖИ мен цифрлық ше­шім­дер көмегімен шалғайдағы ауыл оқушы­ла­рына сапалы білім беру. Атал­ған бас­та­маның артықшылығы бастауыш мектептен бастап-ақ оқушылардың ЖИ-сауаттылығы қалыптасады, мұға­лімдердің цифрлық және ЖИ құзыреті артады, әдістемелік материалдар мен онлайн ресурстар баршамызға қол­жетімді болады. Ең басты артық­шылығы, «Qazaq Digital Mektebi» ауыл мен қала арасындағы білім теңдігін қамтамасыз етеді деген ойдамыз.

Дайындағандар –

Бекзат ҚҰЛШАР,

Айтолған ЖҮНІСХАН,

«Egemen Qazaqstan»