Алматы облысының Талғар қаласында 2009-2010 жылы туған жасөспірімдер арасында бокстан Қазақстан Республикасының «Батыс» аймақтық чемпионаты өтті.
Онда еліміздің түрлі өңірлерінен келген жас былғары қолғап шеберлері бақтарын сынады. Ауданымыздың спортшылары да бұл чемпионаттан тыс қалмады. Сайыста екі боксшымыздың айы оңынан туды.
64 келілік салмақта рингке шыққан Мансур Амантай алдына жан шақ келтірмей І орынды иеленді. 61 келі салмақта Мирас Амантай қарсыласынан сәл кем түсіп, ІІ орыннан көрінді. Осылайша жасөспірім спортшыларымыз Қазақстан Республикасы чемпионатына жолдама ұтып алды. Екеуінің де жаттықтырушылары Тұрарбек Уахитов.
Ауданымыздың абыройын асқақтатып жүрген Мансур мен Мирасқа алға қарай да рингте найзағайдай жарқылдап, жеңіс тұғырынан көрініп, абыройларыңыз биіктей берсін деген ізгі тілегімізді білдіреміз. Жеңісті күндеріңіз көп болсын!
Қанат ҒҰМАРОВ
