Бегәлиев атындағы жалпы орта мектепте республикалық олимпиаданың ІІ кезеңінде жеңіске жеткен оқушыларды марапаттау шарасы ұйымдастырылды.
Алдымен жалпы білім беретін 16 пән бойынша ІІІ орын алған 135 жүлдегерге дипломды аудандық білім бөлімінің әдіскері Жетек Шайхиев табыстады.Ал ІІ орын иегерлерін аудандық білім бөлімі әдістемелік кабинетінің меңгерушісі Нәйля Хасанова ұлығылады.
Қорытындылау шарасында құттықтау сөз алған аудандық білім бөлімінің басшысы Гүлфара Құбаева: - Әуезов атындағы жалпы орта мектепте өткен аудандық олимпиадаға 801 оқушы қатысты. Оның 330-ы яғни 40 %-дан астамы І айналымнан өте алмады. Білім додасын жоғары деңгейде ұйымдастырған аталмыш мектеп басшылығына үлкен ризашылығымды білдіремін. 9-11 сыныптар бойынша І орын алған 39 оқушы республикалық олимпиаданың ІІІ кезеңіне қатысуға мүмкіндік алып отыр, - дей келе, білім бәсекесінің жетістіктері мен кемшін кеткен тұстарын алға тартты.
4,8,9,10,11 сыныптар арасында жеңіс тұғырынан көрінген 51 оқушыға І орынның дипломын ұсынды.
А.Шакупова