Статистикалық мәліметтерге сүйенсек, елімізде жыл сайын отбасынан жапа шеккен 500-ге жуық әйел тұрмыстық зорлық-зомбылықтан көз жұмады екен.
Тіпті, аудан бойынша, мұндай 400-ге жуық отбасы профилактикалық есепте тұр. Бүгінде әйел затының құқығы тапталып, ерінен не айналасындағы жақын-жуығынан пайда таппағандарға мемлекет қолдан келген көмекті аянбауда.
Оған қарсы өлкеміздің түкпір-түкпірінде түрлі шаралар өтіп жатыр. Бұл ретте, Жаңаталап ауылдық округінің мамандары да кенде емес. Осыған сәйкес, Хиуаз ауылының Қоғамдық ғимаратында «Зорлық-зомбылыққа жол жоқ!» атты дөңгелек үстел оздырылды. Оған әйелдер кеңесі және көп балалы аналар қатысты.
Шараны Жаңаталап ауылдық клубының меңгерушісі , әйелдер кеңесінің төрайымы Жанар Төлегенқызы ашып, кейін округтің бас маманы Менсұлу Лубекқызы ауылдағы атқарылған іс-шараларға тоқталды. Ал, мектеп инспекторы Арай Жексенбайқызы қоғамда белең алып отырған келеңсіздіктің алдын алу мақсатында қандай амалдар жасалу керектігіне атап өтті.
Сонымен қатар, әлеуметтік педогог Жансұлу Сисеналиева мен мектеп психологы Сауле Захарбаева нәзік жандылармен түрлі тренинг оздырып, ойындар ұйымдастырды. Жиын соңында әсем ән шырқалып, әсерлі өткен кездесуден қатысушылар жақсы көңіл-күймен тарқасты.
Жайдарлым Қайреден
