Аудан әкімдігінің үлкен мәжіліс залында аудандық қоғамдық кеңестің отырысы өтті.
Кеңес төрағасы Талғат Жаудин күн тәртібімен таныстырғаннан кейін «Аудан бойынша құрылыс және жол құрылысы саласының сапасы бойынша атқарылған жұмыстар» туралы аудандық құрылыс, сәулет және қала құрылысы бөлімінің басшысы Марат Хасанов хабарлама жасады. Кеңес мүшесі Мансұр Қуанышәлиев Асан, Үштаған ауылдарына қашан су берілетінін, сенімгерлік басқаруға кім алғанын сұрады.
Негізінен осыдан он жыл бұрынғы салынған құбырлардың пайдасыз екендігіне, барлық елді мекенді қамту үшін қысымды сәл көтерсе құбырлардың әр жерінен су атқылайтынына куә болғанын айтып, Қоңыртерек ауылында ауыз су мүлдем жоқтығын жеткізді. Азғырдың клубын салып жатқан құрылысшылар өткен әзірде облыс әкімі келіп кеткеннен кейін ертеңгі күні олар да құрал-жабдықтарын жинап, тас бітіп қалды деген сылтаумен ол жерден тайып тұрғандарына ренішін білдіріп, оларды қайтадан жұмыстарына келтіріп, қатаң қадағалауда ұстауды бөлім басшысына тапсырды. Кеңес мүшесі Рифхат Сұлтанияев Кудряшов ауылына клуб салу неге жоспарға енбегеніне қызығушылық танытып, Байда ауылында құрылысы жүргізіліп жатқан су желісінің жұмысы қашан аяқталатынын сұрады. Кеңес мүшесі Гүлжанат Қалиева шағын ауылдарға 300 орындық мәдениет үйін салудың қажеттілігі жоқтығын, ЖСҚ-ға түзету жаслағанда оны 100 орындыққа өзгерту жөнінде ұсынысымен бөлісті.
«Аудандағы шаруа қожалықтарының және ауылшаруашылық құрылымдарының шабындық және жайылым жерлерді пайдалануы туралы» аудандық ауыл шаруашылығы және жер қатынастары бөлімінің басшысы А.Мұфтах хабарламасын ұсынды. Кеңес мүшесі М.Қуанышәлиев: - Мемлекетке қайтарылған 34 га жер учаскесінің ішіне В.Розметовтың жері кіре ме? Азғыр өңірінің тұрғындары қазіргі таңда жайылымдық жерге зәру. Малмен күнін көріп отырған халық төрт түлігін қайда жаярын білмейді. Бүкіл жердің бәрі В.Розметовтың иелігінде. Игерілмеген жері неге қайтарылмайды? – деген сауалдарын қойды. Өз жауабында А.Мұфтах игерілмеген жерлерді қайтару жөнінде облыстық комиссия құрылатынын, содан кейін ол зерделеніп, мемлекетке қайтару жөнінде ұсыныс енгізілетінін айтты. «Қазақстан Республикасының «Білім туралы» Заңы талаптарына сәйкес аудан бойынша жаңа оқу жылына дайындық жұмыстарының орындалысы» жөнінде аудандық білім бөлімі басшысының орынбасары Еділ Баяров баяндады. Кеңес мүшесі Р.Сұлтанияев жылыту маусымына дайындық бойынша сұрағын алға тартса, М.Қуанышәлиев шатыры ұшып кеткен Балқұдық жалпы орта мектебіне жөндеу жұмыстары қалай жүргізілетінін, есепшілердің еңбекақысына неліктен 25 пайыз үстеме қосылмайтынын сұрады. Хабарламашы кеңес мүшелерінің көтерген мәселелеріне өзінің нақты жауабын қайтарды.
Айнагүл Шакупова
