Құрманғазы ауданының төл басылымы «Серпер» қоғамдық-саяси газетіне 90 жыл толуына орай, газет ұжымы және аудандық ішкі саясат, мәдениет және тілдерді дамыту бөлімінің қолдауымен «Серперім – мақтанышым!» атты жазба ақындар мүшәйрасы өтетінін хабарлаймыз.
Жас таланттарды қолдап, шығармашылығын шыңдау мақсатында ұйымдастырылып отырған жыр сайысына 14-29 жас аралығындағы дарын иелері қатысып, өз бағын сынауына мүмкіндігі бар.
Аудандық мүшәйра 3 бөлімнен тұрады:
І бөлімде «Серперім – мақтанышым!» тақырыбында қатысушылар ғасырға жуық тарихы бар басылымның рухани мән-маңызын, халық көкейіндегі түйткілді мәселелерді қозғаудағы айрықша орнын, осы газетте қызмет етіп, тыңнан түрен салған тұлғалар есімін арқау еткен өлеңін оқиды.
II бөлімде «Құрманғазым – құт мекенім» тақырыбы аясында бауырынан елге еңбегі елеулі саңлақтарды түлеткен, табиғаты көз сүйсінтер киелі Құрманғазы өлкесі туралы жазылған өлеңін оқуы қажет.
Ш «Шын жүйрікке тұсау жоқ» бөлімінде үміткерлер жеребе суыру арқылы берілген тақырыпқа 5 минут ішінде 8 жолдан кем емес өлең жазуы тиіс.
Байқауды бағалау критерийлері:
- шығарма идеясы және компазициялық тұтастығының болуы;
- әдеби тілінің байлығы;
- тақырыпты дұрыс аша білуі;
- сахнада өзін ұстау мәдениеті.
Мүшәйраға қатысу үшін 2-14-78 немесе 8-702-575-86-47 телефон нөміріне хабарласып, 22 қыркүйекке дейін тіркелу керек.
Жыр сайысы С.Көшекбаев атындағы аудандық мәдениет үйінде (Құрманғазы ауылы, Абай көшесі, 50 үй) 23 қыркүйек күні сағат: 15.00-де өтеді.
Өнерімен дараланып, қазылар алқасынан жоғары бағасын алған жүлдегерлер арнайы диплом және естелік сыйлықтармен марапатталады.
Ендеше, жазуға жаны құмар жас дарындарды жыр аламанында асыға күтеміз!
Редакция