Атырау облыстық тарихи-өлкетану музейінде Қазақстан Жазушылар одағының ұйымдастыруымен «Ұлттық құндылық – Қазақ этнографиясы. Зейнолла Сәнік-90» атты республикалық экспедициясының дөңгелек үстелі өтті.
Дөңгелек үстелге Қазақстан Жазушылар одағы төрағасының орынбасары, ақын, журналист, этонграф, Қазақстанның еңбек сіңірген қайраткері, Халықаралық «Алаш» әдеби сыйлығының иегері Қасымхан Бегманов, экспедиция мүшелері көрнекті жазушылар мен журналистер, Қазақстан Жазушылар одағы Атырау облыстық филиалының төрайымы, белгілі ақын, қаламгер Әлия Дәулетбаева, облыстық музей, мәдени мұраны зерттеу орталығы, Ғ.Сланов атындағы ғылыми-әмбебап кітапхана басшылары, ақпарат құралдарының өкілдері қатысты.
Қазақстан Жазушылар одағы төрағасының орынбасары Қасымхан Бегманов сапарларының мақсаты Президентіміз ұлттық құрылтайда айтқан құндылықтарымызды ортаға оралту екеніне тоқталып:
– Қазақ этнографиясының Зейнолла Сәнік республикалық экспедициясы екі жылдан бері Алматы қаласында Қазақстан Жазушылар одағының төрағасы, Қазақстанның еңбек сіңірген қайраткері, сіздердің жерлестеріңіз Мереке Құлкеновтің идеясы бойынша іске асқан үлкен бір жоба болғалы отыр. Сол жобаны 362 әулиелі Маңғыстаудың киелі топырағынан, пір Бекеттің басынан бастап айналып келе жатырмыз. Кеше Мұстафа Шоқай қазақ даласымен қоштасқан Кетік қаласына дейін бардық, аудан әкімі бастаған үлкен зиялы қауым күтіп алып, шығарып салып, бір керемет кездесу өтті.
Зейнолла Сәнік қазақтың аса көрнекті этнограф жазушысы. Қытай жеріндегі қазақтардың арасында дүниеге келген. Мен жас кезімде үш рет көрдім. Ол кісінің осыдан екі жыл бұрын 15 томдық шығармалары жарыққа шықты. Шын мәнінде өте дарынды, еңбекқор, ұлттық мүддені қаршадайынан қаламына қару еткен адам. Бұл сапарымыз өте ерекше. Қазақтың ірі кәсіпкері, Зейнолла ағамыздың перзенті, меценат Қанат Зейноллаұлы Сәнік ортамызда отыр. Талай банкирлерді, кәсіпкерлерді көрдім, бірақ, экспедициямен бірге жүрмейтін. Халықтық кұндылықты, қазақтың этнографиясын өз қолына қайтадан тапсыру үшін әкенің аманатын орындауды Қазақстан Жазушылар одағымен бірлесе отырып іске асыруды мақсат тұтқан Қанат Зейноллаұлына шынайы алғысымызды айтамыз. Бурабайда өткен құрылтайда Президентіміз Мереке Әбдешұлын екі рет атап еңбегін бағалады. Қазақтың бір перзенті ретінде 15-20 жылдан бері этнографиямен айналысамын,– деп, дөңгелек үстелге қатысушыларға сәттілік тіледі.
Қазақстан Жазушылар одағына мүшелікке журналистер Нұрислам Құспанғали, Қанат Ғұмаров, Айнагүл Кемалиева, Асылхан Шығыровты қабылдап, куәліктері мен төсбелгісін табыс етті.
Келесі кезекте дөңгелек үстелге қатысушы тарихи мұраны насихаттап жүрген мекемелердің жұмыстары, экспедиция құрамындағы зиялы қауым өкілдерінің пікірлері тыңдалды.
Өз тілшіміз
