Қазақта: «Қамданған қапы қалмайды», деген сөз бар. Аудан әкімдігінде аудандық төтенше жағдайлардың алдын алу және салдарын жою жөніндегі комиссияның кезекті отырысы өтіп, өр суынан қорғану жұмыстарының барысы тыңдалды. Комиссия отырысын аудан әкімі Абат Жанғалиев жүргізді.
Күн тәртібіне сай Құрманғазы аудандық төтенше жағдайлар бөлімінің бастығы Әділ Қонқаев «2025 жылдың көктемгі су тасқыны кезеңіне дайындық және қауіпсіздікті қамтамасыз ету» тақырыбында хабарлама жасап, атқарылып жатқан жұмыстарға тоқталды. Аудан әкімі Абат Сайфоллаұлы хабарламашыға бөлінген қаражаттың игерілуі, қауіпті елді мекендер тұрғындарымен азаматтық қорғаныс бойынша оқулар ұйымдастыру, су өткізу құбырлары жайлы сұрақтар қойды. Келесі кезекте аудандық тұрғын үй-коммуналдық шаруашылық, жолаушылар көлігі, автомобиль жолдары және тұрғын үй инспекциясы бөлімінің басшысы Руслан Сиражевтің осы тақырыптағы хабарламасы тыңдалды.
Бөлім басшысына жанар-жағармай қорын жасақтау жөнінде тапсырма берілді. Ақкөл ауылдық округінің әкімі Әлімбай Әбдрахман ауылдағы су жарып өту қаупі бар жерлерді бекіту қажеттігін алға тартты. Көптоғай ауылдық округінің әкімі Бауыржан Каримов, аудандық №7 өрт сөндіру бөлімінің басшысы Азамат Шайхиев, «Құрманғазы су арнасы» ЖШС-нің бас инженері Алтынбек Еділбайұлының хабарламалары да өзекті тақырып – өр суынан қорғану бағытында жасалып жатқан жұмыстарды қамтыды. Туындаған кейбір сұрақтарға аудан әкімінің орынбасары Марат Хасанов, ауданы әкімі аппаратының құқық қорғау органдарымен жұмыс және жұмылдыру дайындығы бөлімінің басшысы Әсет Тоқтаров жауап қайтарды.
Комиссия отырысын аудан әкімі Абат Сайфоллаұлы қорытындылап, су өткізетін құбырлардың, өрт сөндіру гидранттарының саны хабарламаларда әртүрлі келтірілгенін сынап, нақты санын анықтауды, талдау жасауды, алға қарай жиналысқа толық дайындықпен келуді жауапты лауазым иелеріне тапсырып, бірқатар тапсырмалар берді.
Қанат ҒҰМАРОВ
