Ораза айттың тағылымы ата-баба салтымен терең үндесіп жатыр. Біздің дініміз де, дәстүріміз де бірлік пен ынтымаққа үндейді, өзара сыйлас болуға шақырады. Қасиетті мейрамның құрметіне Самаркин ауылының жастары көпшілік арасында ұмыт бола бастаған мерекені жаңғырту, сезіндіру мақсатында ұлттық спорттың қол күресі, қазақ күресі түрлерінен сайыс ұйымдастырды. Ауызбіршілік танытқан ауыл жастары жарысты өз дәрежесінде өткізу үшін өз қалталарынан қаражат жиып, жүлде қорын жасақтады.
Екі спорт түрі де салмақтары 70 келіге жетпейтіндер мен асатындар арасында өтті. Бұрындары мұндай жарысқа тек осы ауылда тұратындар ғана қатысса, бұл жолы басқа жерлерден де келіп қатысамын дегендерге шектеу қойылмады. Соған сай әр ауылдың кіл мықтылары да күш сынасуға мүмкіндік алды. Қол күресі мен балуандар белдесуін тамашалаушылар қатары қалың болды. Жарысты спортсүйер белсенді Шалқар Асхатұлы жүргізіп, сайыскерлердің қызбалыққа салынбай, спорттық этикаға сай болуын ескертіп отырды.
Тартысты өткен білек күшін сынасушылар арасында 70 келіге дейінгілер арасында Самаркин ауылының тумасы Жаслан Имамұратовқа тең келері болмады. Жүлделі орындарды Нұрлан Рамазан (Бірлік) мен Радик Байғанин (Сафон) өзара бөлісті. Абсолюттік салмақта құрыш білектілердің біршамасы шығып, өз күштерін дәлелдеп көрді. Дейтұрғанмен «мықтының аты мықты» дегендей самарикиндік Айқын Асқарбақыт екінші орын алған Жәлел Мұхситовтан (Арна) да, жаңаталаптық мығым денелі Руслан Искендіровтен де басым түсті.
«Сен тұр, мен атайындар» жиналған балауандар бәсекесі де өте қызықты өтті. Салмағы 70 келіге дейінгілердің ақтық сынында қарсылас шақ келтірмеген Самаркиннің екі балуаны өзара кездесіп, Еркін Шамарданов Ерсін Тұяқбайдан айласын асырып кетті. Үшінші орын Нұржаудан келген Дамир Темірбектің еншісіне тиді. Алыптар айқасына спорттың бірнеше түрінен республика мен әлемдік ареналарда атой салып жүрген кірестілік Ерсейіт Бралиннің қатысуын көрермен қауым қиқулап қошемет көрсете қабылдады. Алайда біразын боз кілемде атып ұрғанынмен финалдық белдесуде оның қара күші Самаркин ауылының тумасы Саян Қайырғалиевтің күрестегі әдіс-тәсіліне төтеп бере алмады. Үшінші жүлде күрестен мықты саналатын Нұржау ауылының балуаны Бейбарыс Робертұлына бұйырды.
Жеңімпаздар мен жүлдегерлерге алдын ала дайындалған медаль мен дипломдар, ақшалы байрақтар мен тұрмыстық техникалар табысталды. Сонымен бірге, қазақ күресінің жеңімпаздарына чемпиондық белдік тағылып, иықтарына қасқыр терісі жабылды. Айт мерекесі барысында бүлдіршіндерге тәттілер таратылып, кешкілікте ауыл азаматтары айт шайында басқосты.
Айбек МЕЙІРМАН
