Ұстаздық ұлы жолда ерен еңбек еткен Абатов Бекболат Абатұлына арналған ескерткіш тақта орнатылды.
Оны М.Ғилаев көшесіндегі ардагер педагогтың өзі тұрған үйінің қабырғасына тұрғызды. Мемориалды тақтаның ашылу салтанатына аудан әкімі Марат Бисенғалиұлы мен ауылдық округ әкімдері, мемлекеттік қызметшілер және арнайы шақырылған қонақтар: білім беру ісінің үздігі Өміржан Саясатұлы, химия ғылымдарының докторы Ербол Сахитұлы мен Жаңаталап ауылдық «Ардагерлер кеңесінің» мүшесі Алтай Елеусінұлы қатысты.
Шараның алғысөзін Өміржан Жұманиязов алып, Бекболат Абатұлының есімін өшірмейтін тақтаны ұсынуда шәкірттерінің ұсынысын жерде қалдырмай, қолдау көрсеткен аудан әкімі мен аппаратына алғысын білдіріп, жүрекжарды тілегін жеткізді.
Бала жанының бағбаны ретінде 47 жылдық еңбек өтілі бар, білім саласында өрелі істердің өркенін жайған, ҰОС ІІ-дәрежелі орденімен наградталған, Қазақ КСР-і «Халық-ағарту ісінің озық қызметкері» белгісінің иесі Бекболат Абатовқа арналған тақтаны ресми түрде Ербол Сахитұлы мен Алтай Елеусінұлы ашты.
Жайдарлым Қайреден
