Ұлылықтың бастауы әз Наурыз мейрамына орай Абай атындағы жалпы орта мектепте мерекелік шара ұйымдастырылды.
Оны мектеп директоры Жамал Хасанова ашып, Ұлыстың ұлы күнінің, қазақтың жаңа жылының ерекшелігі мен өзіндік сипатына тоқталып, қонақтарға қош келдіңін айтты. Аудандық ішкі саясат, мәдениет және тілдерді дамыту бөлімінің басшысы Зияда Жоламанова, Құрманғазы ауылдық округінің әкімі Абдуррахман Муса, Білім беру қызметкерлері кәсіподақтары аудандық комитетінің төрағасы Әуез Ізжанов мерекелік құттықтауларын жеткізіп, Наурыз нақыштары айшықталған ізгі шараны ұйымдастырушыларға зор ризашылықтарын білдірді.
Одан әрі театрландырылған қойылымға кезек беріліп, Жер ана, Сиыр, Барыс жылы, түйе жетелеген Қыдыр ата, гүл Көктем кезегімен келіп, ортаның сәніне айналды.
Ақ жаулықты әжелер отпен аластау рәсімін жасап, шашу шашты. Баршаға Наурыз көже таратылды.
С.Көшекбаев атындағы аудандық мәдениет үйінің өнерпазы Р.Сәрсенова әсем әнін орындады. Мектеп оқушылары да өнерден құр алақан еместіктерін көрсетіп, жарапазан айтып, би биледі.
Одан әрі шара қонақтары білім ошағының алдына тігілген киіз үйге бас сұғып, оқушылар мен ұстаздар қолынан шыққан өнер туындыларын тамашалап, мерекелік дастарханнан дәм татты.
Айнагүл Күнұзаққызы
