Ауданымыздың жас дойбышылары мерейімізді асқақтатып, жеңісті жолдарын жалғастыру үстінде. Соның бір көрінісі ретінде жақында ғана Ақтөбе қаласында 64 шаршылы дойбыдан өткен Қазақстан чемпионатында жеңімпаз атанғанын мақтанышпен айтамыз. Себебі, еліміздің әр өңірінен қатысқан жас спортшылар арасында жеңіске жеткені Қазақстан атынан халықаралық додаға қатысады. Ондай бақыт құрманғазылықтарға бұйырды.
Чемпионатта жас дойбышымыз Есенғұл Амира Ернарқызы жақсы ойын өрнегін көрсетіп, қарсылас шақ келтірмеді. Нәтижесінде бір өзі 2 алтын, 1 күміс медальды олжалап, Түркия мемлекетінің Алания қаласында өтетін әлем чемпионатына жолдама алды.
Шалхар Жайдар Артурұлы ІІ орынды иеленіп, «Спорт шеберлігіне үміткер» атағына ие болды. Жарысқа жас дойбышыларды дайындаған жаттықтырушы Ернар Қаражановтың үкілі үміті ақталып, шәкірті енді әлемдік сайыста бақ сынамақ. Сәттілік серік болсын, жеңіспен оралсын дейміз.
Айнагүл Шакупова
