Бүгінгі ақпараттық қоғамда халықтың құқық жүйесіндегі заңнамалық ахуалмен құлақтанып отыруы аса қажет. Қазір дүкенге кіріп азық-түлік алғаннан бастап, баспанаңды ресімдеу, қызметке орналасу сияқты әлеуметтік-тұрмыстық іс-әрекеттің бәрінде адам өз құқын анық біліп, жаңа заңдық нормалармен таныс болмаса ертеңгі күні опық жеуі ықтимал.
Бірақ жасыратыны жоқ, қазір елімізде заңдылық және құқықтық тәртіп туралы толық ақпараттың көзін табу оңай емес. Себебі ортақ заңдарымызға сүйенген болып, өз алдына әрекет етіп жатқан салалар да көп екені белгілі. Сондықтан ақ пен қараны айыруда көз байланып, күмілжитіндер кездесіп қалады. Ал мемлекетіміз үшін заңдылық және құқықтық тәртіп туралы жан-жақты ақпарат алу өте қажет. Халық бәрін біліп отыруы тиіс. Бұл, әсіресе, заңдылықты қадағалау барысында үлкен қолдау болып табылады.
Осыған орай, аудандық орталықтандырылған кітапханада құқықтық-ақпараттық кеңес беру орталығы, Атырау облысы ішкі саясат басқармасы, «Шаңырақ-2008» Атырау қаласы қоғамдық бірлестігінің ұйымдастыруымен құрманғазылықтарға тегін құқықтық-ақпараттық кеңес берілді. Мақсаты – тұрғындарға тегін заңгерлік кеңес көрсету және азаматтардың құқықтық сауаттылығын арттыру, сондай-ақ құқықтық нормалар мен қолданыстағы заңдарға, оларға енгізілген өзгерістер мен түзетулер жайында ақпарат беру.
Заңгер консультант, Астана қаласы заңгер кеңесшілер палатасының мүшесі Бауыржан Балмағамбетов, облыстық мәслихат депутаты Зәмзагүл Карсакова, аудан әкімдігі жанындағы құқықтық қамтамасыз ету бөлімінің басшысы Маркс Мұстахишев алдарына келген тұрғындардың толғандырып жүрген сұрақтарына жауаптарын беріп, заңдылық тұрғысында кеңестерін берді.
Айнагүл Шакупова