Қазақстан Республикасының 30 жылдығы қарсаңында Құрманғазы аграрлы-техникалық колледжінің құрылғанына 60 жыл толуына орай үлкен мерекелік шара ұйымдастырылды.
Оған кәсіби білім ордасында әріптес мекемелер, қызмет жасаған ардагерлер, колледждің әр жылдардағы түлектері шақырылды.
Салтанатты жиын барысында колледждің директоры Болатбек Өтегенов аудандағы кәсіби білімнің қара шаңырағының өткен жолы, жастарды ауыл шаруашылығына қажетті мамандыққа баулудағы жеткен жетістіктері сараланған баяндамасын жасап, қатысып отырғандарды елміздің басты мерекесімен және колледждің құрылғанына 60 жыл толуымен құттықтады.
Өткен ғасырдың сексенінші және тоқсаныншы жылдарының тоғысында осы кәсіби білім мекемесін басқарған Қадірбай Жармұханбетов артта қалған күндерді ой елегінен өткізіп, марқұм болғандарды еске алып өтті. Аудандық жұмыспен қамту орталығының директоры Базарбай Өтеулиев колледждің «Нәтижелі жұмыспен қамтуды және жаппай кәсіпкерлікті дамытудың 2017–2021 жылдарға арналған "Еңбек" мемлекеттік бағдарламасына белсене қатысып отырғандығын атап өтіп, алға қарай да мұндай әріптестіктің жалғаса түсуін тіледі.
Келесі кезекте шараға арнайы келген қонақтар Қызылқоға аграрлы-техникалық колледжінен Шалқар Нәбидоллаұлы, О.Көшеков атындағы Атырау аграрлы-техникалық колледжінен Жасұлан Рысқалиев құттықтау тілектерін білдірді.
Салтанатты жиынның екінші бөлімі колледждің 60 жылдығына орай шығарылған энциклопедияның тұсаукесерімен жалғасты. Іргелі кәсіби білім ордасының шежірелік кітабының оқырманға жол тарту рәсімін ақын-жазушы Таңатар Дәрелов және Ганюшкин ауылдық округі ардагерлер кеңесінің төрағасы Қадірбай Жармұханбетов жасады.
Бұдан соң колледждер арасында жасалған меморандумға қол қойылды. «Жас маман» бағдарламасы аясында «Механизатор» құзіреттілік орталығының салтанатты ашылу болып, оқу корпусына кірер есік алдына керілген лентаны қию құрметіне аудандық жұмыспен қамту орталығының директоры Базарбай Өтеулиев және «Атамекен» кәсіпкерлік палатасы аудандық филиалының директоры Ұлыбек Өтегенов ие болды.
Шараға қатысшылар орталықтың материалдық-техникалық базасымен, студенттердің кәсіби мамандықтарға машықтану шеберліктерімен танысып шықты.
А.НӘЖІМОВ
