Ауыл балаларының сапалы білімге жолын ашу мақсатын көздейтін ең ауқымды «IQanat» республикалық олимпиадасы биылғы жылы жетінші рет ұйымдастырылып отыр. Бұл - ауылдық жерлерде білім беруді қолдау мен дарынды балаларды дамытуға бағытталған республикалық деңгейдегі бірден-бір теңдессіз жоба.
«IQanat» қоғамдық қор ретінде еліміздің үздік кәсіпкерлерінің бірі, белгілі меценат, «BI Group» холдингі директорлар кеңесінің төрағасы Айдын Рахымбаевтың бастамасымен ірі бизнес өкілдерінің қатысымен құрылды. Қордың алғаш негізін қалаушылар қатарында «Алтын Қыран» компаниялар тобының бас директоры, Исламбек Салжанов, бизнесмен Дәурен Жақсыбеков, «Forbes Kazakhstan» журналының баспагері Арманжан Байтасовтар болды. Соңынан «Zhersu» корпорациясының басшысы Бауыржан Оспанов, Тимур Турлов, Асқар Алшынбаев, Нұржан Субханбердин, Сергей Кан, Серік Төлбасов сияқты танымал кәсіпкерлер қосылды. Одан кейін де еліміздің мықты деген бизнес өкілдерімен толықты. «IQanat» қоғамдық қоры қамқоршылары қатарында ауданымыздағы Ә.Сәрсенбаев атындағы орта мектептің түлектері, жас кәсіпкерлер «Caspian Sea Support» компаниясының жетекшісі Нұрасыл Жарбасов, «SigmaSolutions» жеке фирмасының құрылтайшысы Әсет Рамазановтар да бар.
«IQanat» олимпиадасына ҚР Оқу-ағарту министрлігі қолдау білдіріп, 2018 жылдан бері республикалық олимпиадалар тізіміне енгізді. Білім додасына еліміздің жалпы білім беретін мектептерінің 8 сынып оқушылары қатыса алады. Жеңімпаз болған оқушылар Бурабайдағы «IQanat High School» мектебінің 10-11 сыныбына оқып, білім алып, еліміздің және шетелдің алдыңғы қатарлы университеттеріне түсудің жоғары мүмкіндігіне ие болады. Олимпиада бірыңғай пәндік білімге емес, математикалық сауаттылық, физика, оқу сауаттылығы, Қазақстан тарихы бойынша логикалық сұрақтарға негізделіп, оқушылардың жан-жақты қабілеттілігі тексеріледі. Емтиханның ұзақтығы 80 минутты құрайды. Қараша айының басында өткен «IQanat» олимпиадасына бірінші кезеңіне аудан мектептерінен 370 оқушы қатысты. «IQanat» олимпиадасының алдыңғы жылдардағы жүлдегерлері волонтерлық қызмет көрсетті. Үміткерлердің жұмыстары дербес орталықта тексеріліп, алдағы уақытта қорытындысы жарияланатын болады.
Айбек ӘНУАРҰЛЫ
