Құрманғазы аудандық архив филиалының ұйымдастыруымен Бірлік ауылдық округіне қарасты С.Н.Имашев атындағы жалпы орта мектебінің акт залында Ұлы Отан соғысы және еңбек ардагері Наженов Меллат Мақышұлының туғанына 100 жыл болуына орай жеке тектік құжаттарынан «Ерлік - елге мұра, ұрпаққа өнеге» атты көрме-кездесу өтті. Меллат Мақышұлының жеке тектік құжаттарынан көрме ұсынылып, стенд қойылды. Шараға Бірлік ауылдық округінің еңбек ардагерлері мен мекеме қызметкерлері, ағайындары мен ұрпақтары, мектеп оқушылары қатысты.
Көрме-кездесуді архив филиал басшысы Гүлжеміс Ғатауқызы ашты. Құрманғазы аудандық архиві мекемелердің құжаттарын қабылдап, сақтаумен ғана шектелмейтіндігін, сондай-ақ ҰОС ардагерлерінің, тыл және еңбек ардагерлерінің, Ауған соғысына, Тәжік-Ауған соғысына қатысушы жауынгерлердің, Чернобыль апатын қалпына келтіруші ардагерлердің құжаттарын қабылдап, сақтап, насихаттаумен айналысатындығы туралы түсінік берді. Күні бүгін аудандық архивтің мемлекеттік қорында 351 соғыс, 82 еңбек, 2 ауған, 1 Чернобыль апатын қалпына келтіруші ардагерлердің жеке тектік құжаттарына реттік №56 қор белгіленген. Мемлекеттік есепте сақтауда тұрған жеке тектік құжаттар ішінен мерейлі жасқа жеткен ардагерлерді ұлығылап, Отан үшін от кешкен майдангерлеріміздің ерліктерін өскелең ұрпаққа насихаттап, патриоттық сезімін күшейту мақсатында аудандық архив мекемесі жыл сайын белгіленген саяси іс-шара жоспарына сәйкес әрбір ауылдық округтерде көрме-кездесу ұйымдастырып жүргендігін баяндады. Меллят Нәженовтің жеке тектік құжаты 2008 жылдың 18 қаңтарында Атырау облысы мұрағаттар және құжаттама бөлімінің сараптау тексеру комиссиясының №1 хаттамасы бойынша бекітіліп, №24 іс аудандық архив қорына қабылданған. Шара барысында майдангердің өмірдерегіне шолу жасалды.
Көрме кездесуде Ұлы Отан соғысы және еңбек ардагері Наженов Меллат Мақышұлының көзін көрген, салалас еңбек еткен елдің үлкендері Есеев Абай, Лұқпанова Зәуре және құдасы Ертілеуов Сақтапберген, ауылдық ардагерлер кеңесінің төрағасы Ақбанов Бауыржан, Бірлік ауылдық округ әкімі аппаратының бас маманы Жұмахметова Алена, ағайын-ұрпақтарының атынан Шолтыров Нариман, Наженов Қажымұхан ардагер туралы естеліктерімен бөлісті.
Аудандық архив филиалы басшысы Гүлжеміс Ғатауқызы қорытындылап, «Ерлік - елге мұра, ұрпаққа өнеге» атты көрме кездесуді өткізуге атсалысқан Бірлік ауылдық округ әкім аппаратына, С.Имашев атындағы жалпы орта мектеп, Бірлік ауылдық клуб ұжымына Алғыс хаттар табыстады. «Елі бар да ер есімі ұмытылмайды» дегендей, көрме кездесудің иесі Наженов Меллат Мақышұлының ұрпақтарына Құрманғазы аудандық архив филиалы ұжымы атынан «Мәңгілік тағзым» кітабының 1, 2 томдары естелікке сыйға тартылды. Аудандық архив филиалы алдағы уақытта да соғыс және жоғары мемлекеттік марапаты бар, ел үшін атқарған зор еңбегі бар еңбек ардагерлерінің жеке тектік құжаттарын қабылдайтынын қаперге берді. Көрме-кездесуге қатысып, белсенділік танытқан және өз естеліктерімен бөліскен жандарға Құрманғазы аудандық архив филиалы ұжымы атынан ризашылық білдірілді.
Айнагүл Шакупова
