АЗИЯ ОЙЫНДАРЫНЫҢ ЕКІ ДҮРКІН ЧЕМПИОНЫ, РИО-ДЕ-ЖАНЕЙРО ОЛИМПИАДАСЫНЫҢ (2016) ЧЕМПИОНЫ, КӘСІПҚОЙ БОКСТАН IBO ТҰЖЫРЫМЫ БОЙЫНША ӘЛЕМ ЧЕМПИОНЫ ДАНИЯР ЕЛЕУСІНОВ ауданымызға келіп, құрманғазылық жанкүйерлерімен жүздесті.
С.Көшекбаев атындағы мәдениет үйінде өткен кездесуде спортсүйер қауым ел мақтанышына айналған былғары қолғап шеберін ыстық ықыласпен, қошеметпен, орындарынан тік тұрып қарсылады. Аудан әкімінің орынбасары Қайрат Бөлеков әлемдік додаларда ел намысын қорғап жүрген боксшымызға қош келдіңін айтып, еркін диалог форматында өткелі отырған кездесуге сәттілік тіледі.
Залға жиналған аудан тұрғындары, жастар, жас спортшылар өздерін қызықтырған сұрақтарын қойса, кейбіреулері жылы лебіздерін білдіріп, даңқты Даниярдан толыққанды жауаптары мен кеңестерін алды.
Чемпион боксшы өзінің балалық шағы, әуесқой бокстағы жетістіктері, жас буынға айтар ағалық кеңесі, жастарды ынталандыру мақсатындағы жеке тәжірибесі, кәсіпқой бокстағы жоспарымен бөлісіп, қатысушылармен еркін форматта әңгімелесті.
Кездесуде Данияр Маратұлы бірнеше сұрақ қойып, белсенділік танытқан Құрманғазы ауылының тұрғыны Ниетжан Ғапуұлына өзінің қолтаңбасын қалдырған былғары қолғапты сыйға тартты.
Спорт ардагері Мадат Сәрсекеев алыстан келген қонаққа ақжарма тілегін айтып, ақ батасын берді.
.
