Аудандық мәслихаттың кезектен тыс L сессиясы мен тұрақты комиссияларының отырысын сессия төрағасы Бержан Кенжебаев ашып, күн тәртібіндегі мәселелермен таныстырды.
Күн тәртібіндегі бірінші мәселе аудандық мәслихаттың 2016 жылғы 25 сәуірдегі «2016-2020 жылдарға арналған Құрманғазы ауданының Аумақтық даму бағдарламасы туралы» шешіміне өзгерістер мен толықтырулар енгізу жөнінде аудан әкімінің орынбасары Жандос Бектеміров қысқаша хабарлама жасады.
Хабарламашыға аудандық мәслихаттың депутаттары Рифхат Сұлтанияев, Өмірболат Есенғазиев өзгерістердің кейбір тармақтарына қатысты сұрақтар қойды. Аудандық мәслихаттың депутаты Жұмажан Шакупов арналарды тереңдету жобаларын жасаған мекеме жергілікті шаруа қожалықтарымен ақылдаспаса, балық жүретін негізгі жолдар қазылмай қалуы мүмкін екенін жеткізді. Депутат Болат Абдолов қазіргі жасылып жатырған тереңдету жұмыстарына көңілі толмайтынын айтып, ресейліктердің тәжірибесін пайдалану қажеттігін алға тартты.
Аудан әкімінің орынбасары Ж.Бектеміров өз жауабында айтылған ұсыныстар ескерілетінінен, сонымен қатар екі ел президенттерінің кездесуінен соң іргелес ел де келесі жылы тереңдету жұмыстарына кіріскелі жатқанынан хабардар етті. Келесі кезекте күн тәртібіндегі өзге де мәселелер қаралып, депутаттар тарапынан қолдау тапты.
Қанат ҒҰМАРОВ