Жаңа Жолдауды халық жыл сайын асыға күтеді. Себебі онда еліміздің бір жыл бойғы дамуына, әлеуметтік-экономикалық жағдайына басты бағыт берер мақсаттар айқындалады. Биылғы Жолдауда да біраз мәселелер қамтылды.
Президентіміздің: «Жақында мен Олимпиадаға қатысушылармен кездестім, спорттағы нақты міндеттер мен басымдықтарға тоқталдым. Шын мәнінде, бұл саладағы заңнаманы жаңартатын кез келді деп ойлаймын. Заңға енгізілетін өзгертулер бұқаралық спорт пен балалар спортын дамытуға зор серпін береді. Сондай-ақ болашақ жеңімпаздар шоғырын даярлауға жол ашады. Депутаттар осы маңызды заң жобасына айрықша мән бергені жөн деп санаймын», деген сөздері көңілімнен шықты.
Ауданымызда бұқаралық спорт жақсы жолға қойылған. Спорттың түр-түрінен жарыстарға қатысып әлемдік додаларда топ жарып жүргендер де жеткілікті. Бірақ, академикті де өсіре алатын ауылдан, танымал футболшы немесе хоккейші шықпайтыны несі?! Осы жағы ойлантады. Оның не оқу-тоқуы бар? Қазақтың шетелдіктерден қай жері кем? Бәрін тез үйренуге бейім халықпыз. Қысқасы бізге футбол, хоккей клубтары ауадай қажет. Ауылдық жерлерде балалардың футбол, хоккей құрамаларын құруды қолға алуға тиіспіз деп санаймын. Мысалы, кез келген атаумен футбол клубын ашып, оған доп қууға бейім балаларды шоғырландырып, баптауға болады. Округтерде де сондай клубтар құрылып, жыл бойы жарыстар өтсе, бізден де тамаша ойыншылар шығары анық. Қазір жасөспірімдер көшеде доп қуып жүр. Үлкендер арасында жарыстар жиі өткенімен, балалар командалары көзге көп түспейді. Футбол, хоккей дегенде ішкен астарын жерге қоятындары жетерлік.
Тағы бір айта кетер жайт, спорттық жарыстарға балалар көбіне демеушілердің көмегімен барады. Балалар спорт клубтарына мемлекеттен қаржы бөлінсе құба-құп. Шет жаққа жарысқа кетерде кім ақша берер екен деп жаутаңдаудан құтылар едік. Депутаттар жаңа заң жобасын қолдап, оған енетін өзгерістерге осы жағын да қосады деген сенімдемін. Жалпы, Жолдау бүгінгі күннің өзекті мәселелерін көтергендіктен, оны жүзеге асыру ортақ міндетіміз деп санаймын.
Әнуарбек Сәбитов,
аудандық мәслихат депутаты, спорт жанашыры
