Селектор форматында Атырау облысы әкімі Махамбет Досмұхамбетовтың төрағалығымен отырыс өтті.
Тәуелсіздіктің 30 жылдық мерекесі аясында Мемлекет басшысы Қасым-Жомарт Тоқаевтың бастамасымен қолға алынған «30 қайырымды іс» марафоны облысымызда жалғасын тапқан болатын. Облыс әкімі Махамбет Досмұхамбетовтың бастамасымен, «Ембі Мұнай Газ» АҚ-ның демеушілігімен биылғы жылы жаңа оқу жылы қарсаңында облысымыздағы 7000-ға жуық ерекше қамқорлықты қажет ететін балаларға арналып «Айналайын» қайырымдылық марафоны ұйымдастырылғандығынан облыс әкімінің орынбасары Бақытгүл Хаменова хабардар етті.
Алғашқы сөз легін алған облыс әкімі Махамбет Жолдасқалиұлы:
- Арнайы білім жүйесінде мүмкіндігі шектеулі балаларды сапалы біліммен қамту – мемлекеттік негізде маңызға ие мәселе. Осыған байланысты қоғам алдында олардың жеке басын үйлесімді дамытуға бағыттайтын келелі міндеттер тұр. Аталмыш шара - әлеуметтік осал топ санатындағы ерекше білімді қажет ететін балаларға жасалып жатқан қамқорлықтың бір көрінісі. Балаларға осы қуанышты сыйлаған «Ембі Мұнай Газ» АҚ басқармасына ризашылығымды білдіремін,-деп облыс көлемінде ерекше қажеттілігі бар балаларды жан-жақты қолдау бағытында жоспарланған іс-шараларды атап өтті.
Сондай-ақ, бір топ бүлдіршіндерге мектеп құралы мен қаржылай сертификаттарды табыстады. Қайырымдылық акциясына ауданымызда мектеп жасындағы 344, мектепке дейінгі 127, барлығы 471 бала қатыстырылған.
Аудан әкімі Марат Мурзиев аталмыш марафонды облыс әкімінен қабыл алып, балдырғандар мен ата-аналарды дәртүрлі форматта өтетін жаңа оқу жылымен құттықтады. Ауданымызда биылғы жылы ерекше балалардың білім алуына мүмкіндік жасайтын 1 жаңа инклюзивті кабинет ашу көзделуде.
Еркеназ Қалижан
