Мониторингтік топ мүшелері жеке кәсіпкер Гүлнар Сатылғанованың «Райгүл» көтерме сауда орнындағы азық-түлік бағаларының қолжетімділігін атап өтті.

Әсіресе, ән сағатта бағасы төрт-бес еселеп шарықтап кеткен зімбірдің мұндағы бағасына таңқалысты. Дүкен иесі тауарлардың барлығын іргелес Астрахан облысынан тасымалдайтынын, екі арада ешқандай іркілістің жоқтығын, ол жақта да тауар қорының жеткілікті екендігіне тоқталды.

– Осыған орай Астраханнан әкелінген азық-түліктерге анау айтқан үстеме қосып отырғанымыз жоқ. Елдегі қиын жағдайды әрине ескерудеміз. Бізде картоптың бір келісі 140, 25 келілік ұн 4500, 5 келілік құмшекер 1200 теңгеден сатылуда. Бөлшек саудамен айналысатындармен қатар тұрғындарға да босатамыз. Округ әкімінің ұсыныстары негізінде жағдайы төмен отбасыларға көмектесіп келеміз, - деген ол сауда орнындағы тауар қоймасында қордың жеткілікті екенін көрсетті.

А.НӘЖІМОВ