Қазіргі таңда Қостанай облысына қарасты Әулиекөл ауданындағы 5 ауыл аумағында өрт сөндіріліп жатыр. Бұл туралы Қостанай облысы әкімдігі жанынан ақпараттық штаб мәлім етті.

«5 қыркүйек таңғы сағат 09:00-дегі ақпарат бойынша орман аумағындағы 5 учаскеде өрт сөндіру жұмыстары жүргізіліп жатыр. Олар - Аманқарағай, Лесное, Озерное, Бағаналы және Калинино ауылдары. Өрт шарпыған жердің жалпы көлемі 5 шақырым», - делінген ақпараттық штаб таратқан хабарламада.

«Қазгидромет» РМК мәліметі бойынша бүгін Әулиекөл ауданының аумағында 31°C шамасында жоғары температура сақталады.

Желдің жылдамдығы 7 м/с дейін жетеді.

Ақпараттық штаб дерегінше, қазіргі таңда Новонежин ауылында Төтенше жағдайлар министрлігі бөлімшелерінің көмегімен зардап шеккендерді қабылдайтын шатырлар тігілген.

Өртті сөндіруге 224 техника мен 7 әуе кемесі жұмылдырылған. Сондай-ақ, жеке құрамның 1893 адамы қызыл жалынды ауыздықтау жұмысын жүргізіп жатыр.