Бүгінгі таңда ел экономикасының тұрақты дамуы мен өндірістің өркен жаюы – білікті жұмысшы мамандардың қолында. Қоғамның негізі саналатын осы мамандық иелері – құрылысшы, дәнекерлеуші, механик, жүргізуші, электрик, аспаз секілді кәсіп иелері күнделікті өміріміздің тынысын қамтамасыз етіп отыр.
Кейде қоғамда жұмысшы мамандықтарына деген көзқарастың төмендігі байқалады. Алайда, бұл – түбегейлі қате түсінік. Себебі қандай да бір елдің дамуы, ең алдымен, еңбек адамының маңдай терімен тығыз байланысты. Жұмысшы – тек құрал ұстап, ауыр еңбек ететін адам емес. Ол – кәсібінің шебері, өндіріс технологиясын меңгерген, қауіпсіздік ережесін білетін, ұқыпты, жауапты маман. Соңғы жылдары елімізде техникалық және кәсіптік білім беру жүйесіне баса назар аударылып отыр.
Мемлекет тарапынан “Жастар – ел тірегі”, “Білімді ұрпақ – болашақ кепілі” секілді бағдарламалар арқылы жас түлектерге тегін кәсіптік білім алу мүмкіндігі ұсынылуда. Бұл – болашақ жұмысшы кадрларды даярлауға бағытталған игі бастама. “Адам өзінің сүйікті ісімен ғана биікке көтеріледі”, – дейді еңбек ардагері, слесарь мамандығын 30 жылдан бері абыроймен атқарып келе жатқан Сәлімғали Жантұрғанов.
– Жастар қазір тек кеңсе жұмысына ұмтылады. Бірақ қолмен істейтін нақты жұмыс – нан табудың, елге қызмет етудің бірден-бір жолы. Жақсы маманға сұраныс ешқашан азаймайды,-дейді ол.
Ендеше, біз де қоғамда жұмысшы мамандықтарының қадірін арттырып, жастарды осы бағытқа ынталандыруымыз қажет. Қолы шебер, ісіне адал жұмысшы – ел экономикасының негізі екенін естен шығармауымыз керек.
Сағыныш САЙЛАУБЕКҚЫЗЫ
