«Партиялық емес байқау орталығы» қоғамдық бірлестігі Атырау облыстық филиалы жетекшісі Дәурен Сейітқалиев журналистерге берген арнайы сұхбатында сайлау учаскелерінде заңсыздық тіркелмегінін айтты, - деп хабарлайды Атырау облысының өңірлік коммуникациялар қызметі.
«Қазіргі таңда Атырау облысы бойынша 36 сайлау учаскесі бар. Оларда 150-ге жуық байқаушы жұмыс атқаруда. Олар - таңертеңгі сағат 6.00-дан бастап, сайлау учаскелерінде. Заң бұзушылық байқалған жоқ
. Санитарлық нормаларға сәйкес жұмыстар жүруде» деген ол округ тұрғындарының саяси науқанға қатынасу белсенділігі жоғары екенін атап өтті. «Біздің негізгі мақсатымыз - сайлаудың заңды, әділ өтуін қадағалау. Тұрғындар да жоғары қызығушылық танытып, белсенді қатынасуда. Ауыл әкімін сайлауға әр тұрғынның арнайы келіп, өз таңдауын жасауы – өңірдің өркендеуіне қосқан үлесі» - деді Дәурен Нұхұлы.
Айта кетейік, бүгін бүкіл Қазақстан бойынша оның ішінде Атырау облысында,аудандық маңызы бар қалалардың, ауылдардың, кенттердің, ауылдық округтердің әкімдерін сайлау басталды. Біздің облыста бүгін 6 ауданда және Атырау қаласында 18 ауылдық округ әкімдері сайланады.
