Атырау – Астрахан автожолының (824-833) шақырым арасы көлік қозғалысы үшін ашылды, деп хабарлайды Атырау облысы Өңірлік коммуникациялар қызметі.

Атырау – РФ шекарасы (Астрахан) автожолының Атырау облысына қарасты учаскесінің ұзындығы 217 шақырымды құрайды. Тасжол 4 учаскеге бөлінген. Оның алғашқы (824-833 шақырым арасы) 9 шақырым құрайтын бөлігінің төменгі қабат жабындысы арқылы көлік қозғалысына рұқсат берілді.

Жол төсемінің ені - 9 метр, қалыңдығы - 57 сантиметр. Жоба аясында 220 маман мен 163 арнайы техника жұмылдырылды.

Сондай-ақ, жолдың бойында орналасқан елді мекендердің тұсына мал өтетін өткелдер мен автобус аялдамалары, көлік тұрағымен қоса көпірлер салынады деп жоспарланған. Еске сала кетейік, Республикалық маңызға ие «Атырау-Астрахан» тас жолы бойынша қайта жаңғырту жұмыстары 2018 жылы басталды. 2023 жылы толықтай пайдалануға беріледі деп жоспарланып отыр.