Биылғы Жолдау жаңа әлемге, яғни Төртінші өнеркәсіптік революция әлеміне бейімделудің, соны жетістіктерге жетудің жолын айқындаушы ретінде бағалы әрі күрделі.
Мұндағы атап көрсетілген он тапсырма ел ретінде одан әрі дамуымыздың сара жолы іспеттес. Бірісін алай, екіншісін олай деуге келмейтіні анық. Демек, бір тапсырмасына немкеттілік танытсақ, сол тұстан жел гулейтіні немесе ақсайтыны анық. Жаңа Жолдау кәсіпкерлік сала өкілдері мен шаруа шаруашылықтары басшыларына да тың міндеттер жүктеуде, зор ізденістерге меңзеуде. Ол дұрыс деп те ойлануға тура келеді.
Ізденіп жатсақ, аудан өңірінде көпшілікке жаңа жұмыс орындары боларлықтай жайлар жетіп артылады. Егіншілікті өркендетудің кемшін екені рас. Диқандарымыздың өзі ресейліктер өсірген көкөністерді арзанға алып, бізге қымбатырақ бағаға сатып жүргені жасырын жай емес. Жаңа технологияларды бұл салаға енгізу, ресейліктер қолданып жүрген әдіс-тәсілдер пайдалану әзірге сөз жүзінде ғана қалып келеді. Қытайдың қарға шұқымайтын, құрт түспейтін алмалары сөремізді толтырып тұр. Баяғы тістесең ақ сүттеніп дәмі тіл үйіретін өз өңіріміздің ақ, сары, бурыл, қызыл алмалары ескінің естелігі болып қалды.
Колхоздарда алдыңғы буын өсірген ғажайып алма бақтар болғанын ешкім жоққа шығара алмаса керек. Облыс әкімі Жылыой, Махамбет аудандары қолға алып жатқан Беларусь, Польша мемлекеттерінен әкелінген жеміс-жидектер тұқымын біздің аудан жеріне де егуді қолға алуды нұсқап отыр. Несиеңді қажетіңше ал да, осы мақсатта қам-қарекет қыл деуден жаңылар емес. Әзірге бұған бел шешіп кірісе қоятын ынталы шаруа қара көрсете қойған жоқ. Жер мол, су жеткілікті. Кезінде қарбыз да, қауын да нитрат қоспай- ақ жарыла пісіп, теңкиіп-теңкиіп жататын еді ғой алқаптарда. Қырат-беткейлерде сол егіннің сорабы әлі де ұшырасады. Ол заманда бәрі де қол күшімен атқарылатыны есте. Ақ орамалды әйел-аналар белдері майысып су жүретін жолдар салатын.
Ертеңнен кешке дейін су жырып кеткен тұстарды бітеуге зембіл-зембіл ауыр, дымқыл топырақтарды тасымалдайтын. Егіндіктегі арам шөп атаулыны жұлып, қарға үркітетін. Бейнеті мол тірлікті бастан кеше жүріп, сол орамал тартқандардың өсірген қарбызы мен қауыны, қызаңы мен қияры, жуасы мен картобы игеру бермей қоңыр күзде алқап басында қалып та қоятын. Ауылдың бір топ шуылдақтары сол қалдық егінге қарқ болатын едік-ау! Көзге көрінгенін жарып жеп, көтергенімізше алып дегендей. Демек, біздің жерге егін шығады.
Әлгі айтқандай көп жан қинап, топырақ қазып тасымалдаудың қажеті аз. Бүгіндері егіндік жерді қазып, топырақтың кесегін уатып, дәніңді отырғызып беретін техникалар шықты. Су беру тәсілі де жаңа технология бойынша өзгерді. Не керек, шаруагерлеріміз бен кәсіпкерлеріміздің желкесінің қыры жіберсе, жеткілікті. Үкімет қанша алсаң да несиеден қолыңнан қағып отырған жоқ. Енді не қыл дейсің?! Ең дұрысы егін ек, халқыңды халал өнімге қарқ қыл! Елбасы Жолдауын жүзеге асырыс!
Бұл шаруа бүгінгі күннің қажетін өтеп ғана қоймай, Пайғамбар хадисі талаптарымен де орайлас жатыр. Істеймін, атқарамын дегенге шаруа шаш етектен. Бұған дейін де ертеректе бір жазғанымыздай ауданға қонақ келмей тұрмайды. Өткінші жұрт көп. Жібі түзу көпшілік моншасын салса, болар еді ғой. Тіпті орыс моншасы, шығыстікі дейсің бе, тағысын-тағылардікін... Қазір жаңару заманы, бәрі таңсық, жұртшылық жаңалық атаулыны жат көрмейді, байқайды, ұнағанын пұлын беріп, пайдаланары кәміл. Химиялық тазарту орнын қажетсініп жүргендер де аз емес.
Костюмін иә шалбарын, пиджагін жуып тазарту - сынына мін түсіретінін елдестер әбден біліп болған. «Қаладағыдай химиялық тазарту орнын неге ашпайды, біздің кәсіпкерлер, сол қолдарынан келеді ғой» дегенді жиі ести бастадық. Демек, бұл да ойланатын жайт. Жалпы аудандағы кәсіпкерлік сала өркендесін десек, осындай батыл істерге тәуекел етуіміз керек.
Т.ДӘРЕЛҰЛЫ.
