Сан ғасырлық шежіресі бар Құрманғазы өңірінде талай тарихтың куәсі болған ұлт пен ұлыстар бас қосқан. Ортақ мүдде, ортақ мақсатқа жұмылған өзге ұлт өкілдері мен қазақ шаңырағы бүгінде бір-бірімен құда-жекжат болып араласады. Бірі қазақтан келін алса, енді бірі қазақ шаңырағының түтінін түтетіп отыр. Осындай асыл жан – неміс ұлтының өкілі, қазақ отбасына 1998 жылы келін болып түскен Виктория Халменова. Ол бүгінде жолдасы Русланмен 3 ұл, 4 қызды тәрбиелеп отыр.
Ажырамас туысқа айналды
Халқымыз қиын-қыстау заманда өзге ұлт өкілдерінің басына түскен ауыртпалықты қайыспай бірге көтерді. 1941 жылы Ұлы Отан соғысы басталғанда қуғын-сүргінге ұшыраған Викторияның атасы Розенов Андрей Егорұлы, әжесі Юстус Эмма Александрқызы Махамбет ауданы, Сарытоғай ауылына келіп қоныстанады. Атасы 14 жасында анасымен, іні-қарындастарымен бірге келсе, әжесі 18 жасында жалғыз өзі қазақ жеріне аяқ басып, жетім қалған екен. Сол ауылда еңбек еткен атасы әжесімен 1949 жылы отау құрған. Ал Викторияның әкесі Валерий Райхан есімді қазақ қызымен көңіл жарастырып, шаңырақ көтерген. Дүниеге 3 қыз, 1 ұл әкелген. Виктория 1979 жылы 26 наурызда үйінің тұңғышы болып өмірге келіпті. Бауырлары да қазақ ұлтынан жар сүйген. Осылайша, неміс әулеті бір кездері өздерін бауырына басқан қазақ ұлтымен мыңжылдық құда болып, ажырамас туысқа айналды.
Енесі – татар, абысыны – орыс, келіні – украин
Кейіпкеріміз 19 жасында Құрманғазы ауданы Ақкөл ауылындағы Ұлы Отан соғысының ардагері Ибн Халменовтың шаңырағының табалдырығын аттады. Қайын атасы – қазақ, үлкен енесінің ұлты – татар. Абысынының ұлты – орыс, келіні – украин, өзі – неміс, яғни «интернационал отбасында» бәрі тату-тәтті ғұмыр кешуде.
Виктория осы шаңыраққа келін атанғалы қазақ тілін үйреніп, салт-дәстүрлерімен таныса бастапты. Ата-енесінің тәлім-тәрбиесін, өнегесін бойына сіңіреді. Әкесінің рұқсатымен мұсылман дінін қабылдайды. Оқушы кезінде қолына ұстаған домбырасын ара-тұра шертіп, халық әндерін әуелетіп шырқағанды жаны сүйеді екен. Бүгінде Ақкөл жалпы орта мектебінде информатика пәнінен сабақ береді. Қоғамдық жұмыстарға да белсене қатысып, жастарға білгенін үйретуден танған емес. Өзін «өзге ұлттанмын» деп санамай, бала-шағасының да санасына қазақылықты сіңіріп келеді.
«Жүрегім қазақ деп соғады»
Біз қашан да өзара құрметімізді азайтпай, тату көршілігіміз бен сенімді жолдастығымыз үшін бір-бірімізге разылығымызды білдіруіміз керек. Осы себепті бір күннің белгіленгені дұрыс болды деп ойлаймын. Мен ең алдымен қиын-қыстау кезеңдерде ата-әжемді құшақ жая қарсы алып, қамқорлаған дархан көңіл қазақ халқына ерекше алғысымды білдіргім келеді. Мен неміспін. Бірақ жүрегім қазақ деп соғады!-дейді Виктория Халменова.
Ол жатты жатсынбай, бауырына тартқан қазақтың қонақжайлылығын бір сәт те естен шығарған емес. Пейілі кең қазақтың жерінде туып, өсіп, оның бір шаңырағының түтінін түтетіп отырғанына дән риза.
Ақкөл ауылының тұрғындары Викторияның қазақ болмағанымен, көпке бергісіз келін екендігін айтады.
– Біздің ұлттың бар салт-дәстүрін мығым ұстанады. Ұлттық тағамдарды қалай тамаша дайындайды?! Әр нәресте дүниеге келген сайын шілдехана, азан шақырып ат қою, бесікке салар, тұсаукесер секілді жөн-жоралғыларды міндетті түрде жасайды. Үлкендерге, яғни, ата-енеге, қайын аға, қайын апа, абысындарға сәлем салудан да ешқашан жаңылған емес. Ауылымызға сіңісіп, мақпал мінезімен майдай жағып отырған тамаша келін Викториямыз, — деп жарыса мақтады.
Түйін:
Елімізде 130-дан астам ұлт өкілдері ашық аспан астында ынтымағы жарасып, тату-тәтті өмір кешуде. Алғыс айту күні барша отандастарымыз қайырлы істерге үлес қосып, бір-біріне рахметін айтып, жақсы ниетін білдіреді. Бірегейлігіміздің басты нышаны – достығымыз бен бірлігіміз мәңгі болсын!
Еркеназ ҚАЛИЖАН
