Нұржау ауылында жаңа спорт кешені ашылып, жастардың көптен күткен арманы орындалды. Аталған нысан құрылысы 2023 жылы қыркүйекте басталып, биыл аяқталды. Кешеннің аумағы 5 мың шаршы метрді құрайды. Мұнда футбол, баскетбол, волейбол, теннис ойындарын ойнауға болады. Дәрігер кабинеті, үйірмелерге арналған және киім ауыстыру бөлмелерімен қамтылған. Ауласында газон төселіп, түнгі жарық тартылған 20-40 метрлік жазғы футбол алаңы бар. Бұл кешеннің құрылысына тапсырыс беруші аудандық құрылыс бөлімі, мердігер мекеме «Номад Құрылыс Компаниясы» ЖШС.
Жаңа нысанның ашылу салтанатына аудан әкімі Абат Жанғалиев, аудандық мәслихаттың төрағасы Гүлжаннат Қалиева, аудан әкімінің орынбасары Марат Хасанов, аудан әкімі аппаратының басшысы Данияр Ердешев, ауыл тұрғындары, ардагерлер, жас спортшылар қатысты.
Нұржау ауылдық округінің спорт ардагері Өсер Серікбаев сөйлеп: – Бүгін үлкенді-кішіміздің көкірегімізді түгелдей қуаныш кернеп тұр. Жастарымыздың салауатты өмір салтын ұстануы үшін бұл кешеннің маңызы зор. Ауылымыз осылай көркейе берсін. Нұржау топырағында талай спортшылар қалыптасты. Хатиб немересі Арсен екі жыл қатарынан әлем чемпионы атағын қорғады. Ардагерлер, спортшылар атынан Арсеннің ізін жас ұрпақтар жалғастырсын деген тілек білдіреміз. Біздің Нұржау ауылында спортты дамытуға жағдай жасап жатырған еліміздің азаматтарына көп рахмет айтамыз, – деген ізгі тілегін жеткізді.
Аудан әкімі Абат Жанғалиев құттықтап: – Мемлекет басшысының бұқаралық спортты дамыту, салауатты өмір салтын насихаттаудағы саясатының жемісі – бүгін осы Нұржау ауылында спорт кешенінің ашылуы. Қазір ауданымыздың көлемінде спортты дамыту бағытында бірқатар жұмыстар атқарылып отыр. Осы кешен ауылдың және ауданымыздың атын шығаратын чемпиондардың ордасы болсын, – деді.
Шарада аудан өнерпазы Мейрамбек Сайынұлы «Қазақтың жігіттері» әнін орындаған соң «Номад Құрылыс Компаниясы» ЖШС –нің мердігері Ерлан Қарапайұлы кешеннің символикалық кілтін аудандық балалар мен жасөспірімдер мектебінің директоры Әдебиет Ердешевке табыс етті. Кешен алдына қиылған лентаны спорт ардагері Өсер Серікбаев пен мердігер Ерлан Қарапайұлы қиып, шашу шашылып, ақ ұсынылды.
Аудандық балалар мен жасөспірімдер мектебінің директоры Әдебиет Ердешевті сөзге тартқанымызда: – Бүгін ауданымыздың спорт нысандарының қатары тағы бір ғимаратпен толықты. Мұнда жаттықтырушылар мен техникалық қызметкерлерді қосқанда 22 адам жұмысқа тартылды. Футбол, қазақша күрес, баскетбол, үстел теннисі, волейбол секцияларына жас ерекшелігіне қарай балалар қабылданады. Алға қарай бала санына қарай секциялар қатары толығады. Ертең түрлі сайыстарда туған жеріміздің абыройын асқақтатын спортшылар дайындайтын орынға айналады деген сенімдеміз, – деді.
Қанат ҒҰМАРОВ
