Ұлыстың ұлы күні деп әспеттейтін биылғы Наурыздың сән-салтанаты тіптен ерекше. Ұйымдастырушыларға мың алғыс! Жүректің жазына айналып, көңілде сазы қалды. Алдымен ауданның 19 округінде бірдей атап өтілуі. Бәрін көрмесек те әлеуметтік желіден байқағандарымызға көңіл толды. Шығарып салма емес, шынайы мерекеге айналып, халық ықыласын туғызды. Аудан орталығында тігілген киіз үйлердің сыртқы ажары былай тұрсын, ішкі жасау жабдығы ата-баба дәстүріне лайық болды. Жақсыны – жақсы деу керек. Барлық ұжымдар да бір-бірінен қалмауға тырысып ақ баққан еңбектері ақталды.
Биыл белгілі бір адамдарды, лауазым иелерін, иә, ақсақал-қарасақлдарды бөлектеп ас беріп, алалау болған жоқ. Төре де төмен де тең болды. Қай киіз туырлықтың сықырлауығын ашсаң да жымиып күлген ұлттық киімдегі «айналайындар» ақ бауырсақ, Наурыз көжесін аузыңа тосып, мейірімдерімен мелдектейді. Қазақ айтқан, әңгіме тамақта емес, қыраусыз қабақта екенін ұғынудың өзі бір ғанибет!
Ұлт-аспаптық ансамбль көркімен де, орындау шеберлігімен де толайым жұртты қазыққа байлағандай тырп еткізбейді. Дирижер баламыз мықтылығын дәлелдеді, оған ақ жол! Әлі де тәжірибесі жетілер, әр шығармадан соң халыққа қарап дәстүрде бар ишараны білдіріп қойса, одан әрі мәз боламыз ғой. Сауаттылығы шығар классикалық шығармаларға көбірек орын берілді. Біз – Құрманғазы мен Дина ұлылардың ұрпағымыз, демек оларды қағыс қалдырмауымыз керек!
Соңғы айтқымыз келгені: Үлкен де кіші де, етектілер де, ерлер де, бала да шаға да ұлттық киіммен шықты. Көпшілігіміз әрине. Жылдағыдан ерекше, әркім өзіне жарастысын таңдап, талғап киген. Осыған шынымен қуанып, осы шағын ризашылығымызды айтпасымызға болмады. Ата-баба дәстүрін ұлықтау – «Біз кімнен кембіз» деген ұлттық намыс осы жеме-жемге келгенде. Танымайтын ағайынды да жат көрмей құшақтап қалыппыз. Өйткені үстінде ұлттық киім! Алдағы халықаралық ынтымақ күні, Жеңіс күні де ұлттық киімді ұлығылауды үрдіске айналдырайық, намысқа жаралған құрманғазылықтар!
Таңатар Дәрелұлы,
ауданның Құрметті азаматы,
«Құрмет» орденінің иегері
