Бұдан бірнеше жыл бұрын кәсіпкерлік салаға, соның ішінде дәріхана бизнесіне бет бұрған Анар Сүгірәлиеваның иелігіндегі «Beknazar» дәріханасын білмейтіндер кемде-кем шығар. Дертіне дауа іздеген сырқаттар мұнда жиі бас сұғады. Фармацевтика саласы кәсіпкерлік ортаға берілгелі бері бізде өте жақсы дамып келеді. Аудан орталығының өзінде осындай орындар жетерлік, бірінде жоғын бірінен тауып дәрі іздегендер сабылып көп қиналмайды.
Кеңестік кезеңнен қалған бұрынғы дүкеннің аядай бөлмесін жалға алып кәсібін дөңгеленткен Анар азғана уақыттың ішінде бәсекеде есесін жібермейтін бизнес-ледиге айналды. Табысы молайып, дәріханаға бөлек ғимарат салып кәсібін кеңейтуді көздеді. Бұл ойын жүзеге асыруды азаматы Есболат Ерқанатұлы да құп алып, жаңа нысанды салудың қамына кірісті. Бір жылдың шамасында ерінбей еңбектеніп, көшеге көрік беретін еңселі екі қатарлы ғимаратты салып бітірді. Оның ашылу салтанатында аудан әкімінің міндетін атқарушы Марат Хасанов кәсіптеріне береке тілеп, жеке кәсіпкер Анар Жұмабекқызын аудан әкімінің Құттықтау хатын табыстады.
Аудандық орталық аурухананың директоры Саида Уахапқызы да құттықтау сөз алып, тұрғындардың денсаулығын жақсартуға атсалысып келе жатқан кәсіпкер ханымның тындырымды ісіне өз бағасын берді. Балаларының отбасылық бизнесті бастауына үлкен себепкер болған Ерқанат Жолжанов ағамыз адал кәсіп жасауға үгіттеген ақ батасын берді.
Су жаңа нысан - «Beknazar» дәріханасының кіреберісіне керілген қызыл лентаны аудан әкімінің орынбасары Марат Хасанов пен өңірімізге белгілі кәсіпкер Құралай Ырзағалиева қиып жиналған жұртшылықты ішке бастады.
Жаңа дәріхана тұтынушыларға қызмет көрсету үшін өте қолайлы, кең бөлмеде бірнеше касса жұмыс жасайды. Әйнек сөрелерден қажеттінің бәрін табуға болады. Медициналық препараттарды сақтаудың барлық жағдайы ескерілген.
Дәрі-дәрмектерді белгілі бір температурада сақтайтын қоймамен, тоңазытқышпен жабдықталған. Көп дәріханаларда кездесе бермейтін қан қысымын өлшейтін арнайы орын да ойластырылған. Нысанның екінші қабатында болашақта емдік кабинеттер мен басқа да қызмет көрсету орындарын ашпақ ойлары бар.
Айбек НӘЖІМОВ
