Қазақстан мұсылмандары діни басқармасы биыл құрбандық шалу рәсімі қалай атқарылатынын түсіндірді.

2021 жылы құрбан шалу рәсімі екі жолмен өткізіледі. Біріншісі, мемлекеттік санитарлық-эпидемиологиялық қадағалау органдары тарапынан рұқсат берілген жергілікті қасапханаларда санитарлық ережелерді қатаң сақтай отырып құрбан шалу, яғни дәстүрлі жолмен ұйымдастырылады.

Ал, екіншісі, қазіргі пандемия жағдайында құрбан шалушыға қолайлы жағдай жасау және көмекке мұқтаж жандарды қолдау мақсатында өткен жылдың тәжірибесі негізінде www.qurban2021. kz сайты арқылы тапсырыс беріп, онлайн режимде құрбандық шалынады.

Мүфтият мамандарының мәлімдеуінше карантин жағдайында қалада тұрып жатқан азаматтар үшін қашықтықтан өз атынан құрбан шалуға тапсырыс беру – оңтайлы шешім екені атап өтіледі. Адам баласының кейбір жағдайда бұл істі орындауға мүмкіндігі болмай қалған жағдайда шариғат бойынша адам өзінің атынан басқа кісіні белгілі бір іске уәкіл етіп, басқа біреудің көмегіне жүгіне алатындығы айтылады. Діни басқарма ауылдық жерде жеке тұрғын үйде тұратын әр адамның мұсылмандық міндетін атқаруына ешқандай шектеу жоқ екенін ерекше атап өтеді. Онлайн құрбандыққа тапсырыстар www.qurban2021.kz сайтында 20 шілде күні айт намазынан кейін қабылданады. Мұқтаж отбасылардың өтініштерін қабылдау, сараптау және құрбандық еттерін жеткізіп беру жұмыстарымен мүфтияттың жергілікті өкілдіктері айналысады.

«ҚМДБ қаржыға араласпайды. Құрбандыққа шалынатын түлік бағасы жергілікті нарық бағасымен көрсетіледі. Осы орайда еліміздің әр аймағындағы малдың бағасы әртүрлі екенін ескеру қажет. Нұр-Сұлтан, Алматы, Шымкент және облыс орталықтарында малдың бағасы бірдей болмауы мүмкін. Ал тапсырыс берушіден түскен қаражат мал иесіне, яғни сатушыға тікелей беріледі. Өйткені бұл делдалдық қызмет емес. Көрсетілген сомаға қасапшының қызметі ғана кіреді», – дейді мүфтият өкілдері.

Онлайн тапсырыс беру кезінде құрбандық етін бөлшектеп, мұқтаж жандарға тарату сынды барлық ұйымдастыру жұмыстарын мешіт жамағаты мен еріктілер тегін атқарады. Осы орайда діни басқарма құрбан шалу кімге уәжіп екенін тағы бір мәрте еске салды. Ханафи мәзһабында құрбан айт күндері бай адамға құрбан шалу – уәжіп (міндет). Ал шариғат «бай» деп мал-дүниесі нисап мөлшеріне жеткен адамды айтады. Нисап мөлшері – 40 қой (ешкі), 30 ірі қара, 5 түйе немесе қажеттілігінен артық 85 гр алтын (1 230 000 теңге) қаражат. Мал-дүниесі нисап мөлшеріне жетпеген, яғни жағдайы төмен мұсылманға құрбан шалу міндет емес.

Ақпарат көздерінен дайындаған А.МЕЙІРМАН