Атырау облысына қарасты Жанаталап ауылында мүмкіндігі шектеулі жандар мен олардың отбасыларына арналған отбасылық спартакиада ұйымдастырылды. Жарыстар жаңа спорт кешенінде өтті.
Биылғы жылы спартакиадаға алты команда қатысты. Қатысушылар үш кезеңнен тұратын бағдарлама бойынша сынға түсті: жылдамдық, ептілік пен командалық өзара әрекетке негізделген отбасылық эстафета, дәлдік пен стратегиялық ойлауды дамытатын паралимпиадалық спорт түрі — бочча ойыны, сондай-ақ командалық форматтағы «крестики-нолики» сайысы.
Әрбір сын балдық жүйе бойынша бағаланып, қорытындыда үш жүлделі орын анықталды. Дегенмен, спартакиаданың басты мақсаты – тек жеңіс қана емес, сонымен қатар бірлік, қолдау мен ортақ қуаныш атмосферасын қалыптастыру.
Қатысушылардың арасында 59 жастағы Яда Кабаканованың отбасы болды.
– Мен немерелеріммен келдім: үлкен немерем 12 жаста, ортаншысы 11 жаста, ал ең кішісі 8 жаста. Біз бүгін осында, қызғылт сары формада болдық, – деді ол.
Күтілімдері туралы сұраққа жауап берген Яда: «Көңіл-күйіміз өте жақсы. Балалар үшін спортпен айналысу өте пайдалы. Олар мұның маңызды екенін түсінеді. Ал біз үшін бұл – отбасымен бірге өткізген уақыт әрі даму» – деп атап өтті. Кабаканова жиырма жылдан бері арбада жүрсе де, қоғам өміріне белсене қатысуға тырысады.
Отбасылық спартакиада «Тиімді реабилитация» жобасы аясында «Biz de adambyz» қорының ұйымдастыруымен және «Теңізшевройл» компаниясының қолдауымен өтті.
Алена СОЛОДОВНИКОВА
Автордың фотосы
