2025 жылдың басынан бастап Мемлекет басшысының бастамасымен Қазақстанда ауқымды республикалық «Таза Қазақстан» акциясы жүзеге асырылып келеді. Бұл бастама экологияға ғана емес, сондай-ақ азаматтардың патриоттық сезімі мен экологиялық санасын тәрбиелеуге де зор үлес қосуда.
Акция бірнеше маңызды бағытты қамтиды: таза өндірісті дамыту, табиғи және киелі орындарды сақтау, аулалар мен көшелерді, қоғамдық аумақтарды тазарту, сондай-ақ бұлақтар мен су қоймаларының тазалығын қамтамасыз ету. Бұл шаралардың әрқайсысы қоршаған ортаны сауықтыруға өз үлесін қосып, қоғамның түрлі өкілдерін — азаматтар, бизнес, студенттер, оқушылар және билік өкілдерін — ортақ игі іске жұмылдырады.
Экологиялық таза шешімдерді енгізуге ерекше көңіл бөлінуде. Ел қалаларында пластик пен алюминий қалдықтарын қабылдайтын экобокстар мен фандоматтар орнатылуда. Олар азаматтарды қайта өңделетін қалдықтарды тапсыруға ынталандырып, арнайы бонустармен марапаттайды. Бұл халық арасында қалдықтарды сұрыптау мен қайта өңдеуге тапсыру әдетін қалыптастыруға ықпал етеді.
Бастаманың маңызды бір бағыты — ауқымды көгалдандыру. Мемлекеттік орман қоры аумағында 1,3 миллиардтан астам көшет отырғызылды, оның ішінде Арал теңізінің құрғаған табанында 48,7 миллионнан астам сексеуіл егілді. Бұл шаралар экологиялық тепе-теңдікті қалпына келтіру және климаттың өзгеру салдарымен күресу тұрғысынан стратегиялық маңызға ие.
Сонымен қатар, заманауи технологиялар да бұл бағытта көмекші құралға айналуда. 2024 жылдан бастап Қазақстанда @TazaQazBot телеграм-боты сәтті жұмыс істеп келеді. Оның көмегімен азаматтар өз елді мекеніндегі экологиялық және абаттандыру мәселелері туралы хабарлай алады.
«Таза Қазақстан» бастамасы — бір реттік акция емес, елді таза болашақ жолында біріктіретін жалпыхалықтық қозғалыс. Бұл бастама экология туралы ғана емес, ол — Отанға деген сүйіспеншілік пен ортақ жауапкершілік туралы.
Нұрхан Бағытжанов,
«Ассамблея жастары» республикалық қоғамдық бірлестігінің Атырау облысы бойынша төрағасы
