Бұл туралы Атырау облысының әкімі Махамбет Досмұхамбетов "Айқын" газетінде жарияланған мақаласында жазды.
«Nur Otan» партиясының «Өзгерістер жолы: әр азаматқа лайықты өмір!» сайлауалды бағдарламасына сай денсаулық пен білім беру саласына айрықша көңіл бөлінді. 2021–2025 жылдары 10 нысанды күрделі жөндеуден өткізу жоспарланып, биыл 2 дәрігерлік амбулаторияда осындай жұмыстар жүргізілді.
Жедел жәрдем қызметін санитарлық автомобильдермен және реаномобильдермен қамтамасыз ету үшін 60 автокөлік сатып алынды. Өңірдің медицина саласын қажетті кадрлармен, соның ішінде ауылдық елді мекендерді жас мамандармен қамту үшін облыс әкімінің 71 гранты бөлінді. Облыс мектептеріндегі білім беру сапасын арттыру бойынша тың жобаны қолға алдық. «Атырау облысында білім беруді дамытудың «2021-2023 жылдарға арналған жол картасы» әзірленіп, іске асырылуда. Бұл бағытта «Назарбаев зияткерлік мектептері» дербес білім беру ұйымдарымен бірлесе жұмыс жүруде" делінген мақалада.
