Президент Жолдауында еліміздің даму бағыты ретінде цифрландыру мен жасанды интеллектіні кеңінен енгізу мәселесіне ерекше мән берілді. Қазіргі таңда технология тек қосымша құрал емес, мемлекеттік басқарудың тиімділігін арттыратын негізгі тетікке айналып отыр.
Дерекке сүйенген шешімдер қабылдау – заман талабына сай мемлекеттің басты белгісі. Жасанды интеллект мемлекеттік қызмет көрсету сапасын арттыруға, басқару үдерістерін оңтайландыруға және адам факторынан туындайтын тәуекелдерді азайтуға мүмкіндік береді. Ақылды жүйелер арқылы уақыт пен ресурсты үнемдеу, ашықтықты қамтамасыз ету және халыққа қолайлы қызмет ұсыну жолға қойылуда. Бұл – тиімді мемлекетті қалыптастырудағы маңызды қадам. Сонымен қатар, технология дамыған сайын жауапкершілік те арта түседі. Жасанды интеллектіні қолдануда адами бақылау мен ұлттық мүдде басты орында болуы тиіс. Президент Жолдауында айтылғандай, инновация мен саналы басқару үйлесім тапқанда ғана қоғамның тұрақты дамуына жол ашылады.
