«WORLD NOMAD GAMES 2026» VI Дүниежүзілік көшпенділер ойынында көкпардан жеңіске жеткен Қазақстан ұлттық құрамасының сапында атыраулық спортшы Абылай Ұлықпанов та өнер көрсетті, – деп хабарлайды Өңірлік коммуникациялар қызметі.
Абылай Ұлықпанов 2024 жылы Қазақстан ұлттық құрамасының сапына қабылданған. Алайда 5-Дүниежүзілік көшпенділер ойынына дайындық кезінде жарақат алып, жарысқа қатыса алмаған. Араға екі жыл салып, спортшы VI Дүниежүзілік көшпенділер ойынында ұлттық құрама сапында бақ сынады.
– Биылғы додаға дайындық үш кезең бойынша жүргізілді. Алғашқы кезеңде Алматыда физикалық дайындыққа басымдық берілді. Кейін Ұзынағаш ауылында атпен жаттығулар өткіздік. Ал үшінші кезең Қырғызстанда өтіп, команда жарыс жағдайына бейімделді, – деді А.Ұлықпанов.
Спортшының маңызды жетістіктерінің бірі – 2023 жылы Қызылорда облысында өткен Қазақстан чемпионатындағы жеңісі. Сол жарыста «Нарын» командасының капитаны болған Абылай Ұлықпанов бастаған құрама Қостанай командасын 5:1 есебімен жеңген. Бұл додада спортшы оң аяғынан жарақат алған.
Ал биылғы Көшпенділер ойынында атыраулық көкпаршының ойыны әлеуметтік желі қолданушыларының да назарын аударды.
