Қазақстан Республикасы Экология және табиғи ресурстар министрлігінің «Қазгидромет» РМК Атырау облысы бойынша филиалы 2026 жылғы 8 сәуір сағат 08:00-дегі гидрологиялық мониторинг нәтижелерін жариялады.
Мемлекеттік бақылау желісіндегі деректерге сәйкес, облыстағы негізгі су нысандарының деңгейі тұрақты бақылауда. Көптеген гидробекеттерде су деңгейі маусымдық өзгерістерге сай қалыпты шекте тіркелген.
Атап айтқанда, Жайық өзені бойынша Индербор, Махамбет, Атырау қаласы, Жанаталап және Еркінқала маңындағы бекеттерде су деңгейінің біршама көтерілуі байқалғанымен, қауіпті шектен аспаған. Сондай-ақ Қиғаш, Шарон, Жем, Ойыл, Сағыз және Ноғайты өзендеріндегі жағдай да тұрақты.
Мамандардың мәліметінше, барлық бақылау нүктелерінде мұз толық еріп, өзендер «таза» күйге өткен. Бұл көктемгі су тасқыны кезеңінің белсенді фазасына өткенін көрсетеді.
Сонымен қатар, 2026 жылғы 7 сәуірдегі мәлімет бойынша Жайық өзенінің Махамбет ауылындағы су деңгейі 486 см-ді құрап, су шығыны 265 м³/сек болған.
Жалпы алғанда, өңірдегі гидрологиялық жағдай тұрақты деп бағалануда. Дегенмен, көктемгі су тасқыны кезеңінде өзен деңгейінің өзгеруі жалғасуы мүмкін болғандықтан, мамандар тұрғындарды ресми ақпараттарды қадағалап отыруға шақырады.
Алтыншаш ҚҰРМАШЕВА
