JasUp жобасы инженерия, технология және өнеркәсіп салаларына қызығушылық танытатын жастар үшін бірегей мүмкіндіктер жасауды жалғастыруда. Осындай бастамалардың бірі — «ТШО-да бір күн» акциясы, ол "Теңізшевройл" компаниясымен бірлесіп ұйымдастырылды.
Бұл акция аясында қатысушылар Қазақстандағы ең ірі мұнай-газ компанияларының бірінің жұмыс атмосферасына бір күнге еніп, инженерлермен танысып, нақты жұмыс процестерін көріп, мамандардың кәсіби жолы туралы көбірек білуге мүмкіндік алды.
Көптеген қатысушылар үшін ТШО бұрын жабық әрі қолжетімсіз компания болып көрінетін. Алайда, акция бұл түсінікті өзгертуге мүмкіндік берді.
Жоба қатысушысы Дарья Бегалиева бұл бастаманың арқасында компания ішіндегі жұмыс қалай ұйымдастырылатынын көруге мүмкіндік алғанын айтты.
«Бұрын мен үшін ТШО өте жабық компания болып көрінетін, сондықтан оның есігінің ар жағында не болып жатқанын білу қызық еді. Осы акцияның арқасында мен жұмыс процестері, компанияның құндылықтары мен ережелері туралы білдім. Біздің арамызда IT бөлімінің инженерлері болды, сондықтан бұл салада да көп жаңа мәлімет алдым», — деді Дарья.
Компания қызметімен танысудан бөлек, қатысушылар өз жобаларын кәсіби инженерлермен талқылауға мүмкіндік алды. Дарьяның айтуынша, инженерлердің бірі оның жобасын жоғары бағалап, оны әрі қарай дамыту үшін пайдалы кеңестер берген.
Енді ол өз жобасымен жұмысын жалғастырып, химик-инженерлермен жеке кеңесуді жоспарлап отыр.
Акцияның тағы бір қатысушысы Арсен Аманжолұлы ТШО компаниясының бағдарламашы-инженерімен сөйлесу ерекше құнды болғанын айтты.
«Бүгін маған ТШО компаниясының бағдарламашы-инженерімен сөйлесуге мүмкіндік туды. Ол қандай жобалармен жұмыс істейтінін көрсетіп, өзінің негізгі міндеттері мен тапсырмаларды іске асыру кезеңдері туралы егжей-тегжейлі айтып берді, сондай-ақ компания ішіндегі кәсіби даму жолымен бөлісті», — деді Арсен.
Қатысушылар үшін мансаптық мүмкіндіктер мен халықаралық білім алу туралы әңгімелер де ерекше қызықты болды. Атап айтқанда, Болашақ мемлекеттік білім беру бағдарламасы және мамандардың шетелде, соның ішінде Жаңа Зеландия елінде білім алу тәжірибесі талқыланды.
«ТШО-да бір күн» акциясы JasUp жобасының жастардың талантын қолдауға және дамытуға бағытталған маңызды бастамаларының бірі болды. Осындай кездесулердің арқасында мектеп оқушылары мен студенттер инженерлердің нақты жұмысымен танысып, өздерін қызықтырған сұрақтарды қойып, кәсіби кеңестер алуға сирек мүмкіндікке ие болады.
Мұндай кездесулер қатысушыларға индустрияда қандай дағдылар мен білімдер сұранысқа ие екенін жақсы түсінуге көмектеседі, сондай-ақ өз жобаларын дамытуға және техникалық әрі ғылыми бағыттарда мансап құруға шабыт береді.
Ұйымдастырушылардың айтуынша, мұндай акциялар алдағы уақытта да жалғасып, жастар үшін жаңа көкжиектер мен кәсіби өсу мүмкіндіктерін аша береді. Айта кетейік, акцияға барлығы 16 мектеп оқушысы мен студент қатысты.
