Атырау облысында Lira порталы арқылы балаларды тегін қосымша біліммен қамту жұмыстары жүргізілуде. Қазіргі уақытта портал арқылы 200-ге жуық қызмет көрсетуші 24 719 баланы тегін курстармен қамтамасыз етіп отыр. Оның ішінде 140-ы спорттық бағытта, ал 58-і мәдениет саласында қызмет көрсетеді. Бұл туралы Өңірлік коммуникациялар қызметі хабарлады.
Жоба аясында балаларды спорттық, мәдени және шығармашылық үйірмелерге тіркеу, сондай-ақ мемлекеттік қаржыландырудың ашықтығын бақылау мүмкіндігі қарастырылған.
Облыстық білім басқармасының басшысы Марат Әбуовтің айтуынша, Lira цифрлық порталы толыққанды жұмыс істеп тұр.
– Балаларға қосымша білім беру бойынша мемлекеттік білім беру тапсырысы аясында қызмет көрсететін мекемелерді қаржыландыруға қатысты барлық үдерістер осы портал арқылы жүзеге асырылады, – деді ол.
