4 маусым – Қазақстан Республикасының Мемлекеттік рәміздер күні. Бұл күн әрбір қазақстандық үшін ерекше мәнге ие. Өйткені мемлекеттік рәміздер – халқымыздың тәуелсіздігін, бірлігі мен егемендігін айқындайтын қасиетті құндылықтар.
Көк Туымыз, айшықты Елтаңбамыз және асқақ Әнұранымыз – Тәуелсіз Қазақстанның әлем алдындағы келбетін танытатын басты нышандар. Олар еліміздің өткені мен бүгінін байланыстырып қана қоймай, болашаққа деген сенімімізді нығайтады. Сондықтан мемлекеттік рәміздерді құрметтеу – әр азаматтың парызы.
Бүгінде жастар арасында патриоттық тәрбиені күшейту маңызды бағыттардың біріне айналып отыр. Бұл ретте мемлекеттік рәміздердің маңызын насихаттау ерекше рөл атқарады. Себебі Отанға деген сүйіспеншілік туған елдің тарихын, мәдениетін және мемлекеттік құндылықтарын құрметтеуден басталады.
Мемлекеттік рәміздер күні – ұлттық мақтаныш пен елдік рухты дәріптейтін маңызды мереке. Бұл күн әрбір азаматқа Тәуелсіздіктің қадірін сезіндіріп, елге деген сүйіспеншілікті арттыра түседі деп сенемін.
— Мадина Ерболатқызы, журналист
