Аға буынның ізімен

Спорт

Өзінің 90 жылдық тарихында ауданымыздан спорт саласында талай саңлақтарымыз топ жарып, намысты қолдан бермегендерін зор мақтанышпен айтамыз.

Спортта айтарлықтай жетістіктерге қол жеткізгеннің ішінен Ұлы Отан соғысына қатысушы, 6 рет Қазақстан біріншілігінің жеңімпазы, КСРО халықтары спартакиадасының жүлдегері Жорес Ысқақов ауызға бірден ілігеді. Спортқа есейіп барып келген ол, соғыстан кейін физкультура институтында оқып, еркін күреспен шұғылданады, спорт шебері атанды. Республикалық жарыстарда тең қарсылас көрмеген Жорес Абдошұлы еліміздің құрамасы сапында одақтық жарыстарға барып жүлделі орындардан көрініп жүрді. Спорттық кезеңін аяқтағаннан кейін Жорес аға жаттықтырушылыққа ауысып, Гурьев пединститутында аға оқытушы болады. Оның ондаған шәкірттері талай дүбірлі додада топ жарып, облыстың атағын шартарапқа таратты. Спорт саласындағы жоғары жетістіктері, жас жеткіншектерден боз кілем шеберлерін дайындаудағы еселі еңбегі үшін Жорес Абдошұлы Ысқақов Қазақ ССР-на еңбек сіңірген мәдениет қызметкері, Қазақ ССР-на еңбек сіңірген жаттықтырушы деген құрметті атақтарға ие болды.

Тек ауданымыз ғана емес, еліміздің де мақтанышына айналған тағы бір саңлағымыз – Сәбит Сатыбалдиев. Байда ауылдық округінде туып-өскен ол Сафондағы орта мектепті аяқтағаннан кейін Қазақ мемлекеттік дене шынықтыру институтына оқуға түседі. Классикалық (грек-рим) күрестен республикалық, одақтық сайыстарда топ жарды. Кейін жаттықтырушылық жолға түсіп, әйгілі палуандар В.Рязанцев, Ж.Үшкемпіров, Ш.Серіков, Д.Тұрлыхановтарды жаттықтырған білікті бапкерлер сапында жүрді. Сәбит ағамыз Гурьев пединститутында, Қазақ дене шынықтыру институтында, Алжир мемлекетінің университетінде дәріс берген тәжірибелі де білікті ұстаз. Грек-рим күресінен спорт шебері, Қазақ ССР-на еңбек сіңірген жаттықтырушы, көптеген марапаттардың иегері.

Спортшыларды дайындауда, салауатты өмір салтын насихаттауда еселі еңбек еткен азаматтардың бірі – Қожахмет Шәмбілов. Қазақ мемлекеттік дене шынықтыру институтының түлегі, ұзақ жылдар Гурьев педагогика институтында оқытушы, аға оқытушы, кафедра меңгерушісі болып нәтижелі еңбек етті. Тағы бір жерлесіміз Өтепберген Құралов та осы салаға маңдай терін арнады. Ауданнан барған талай талантты жастарды қамқорлықтарына алып, спорттағы қадамдарын қадағалап отырды. Олардың кезінде спорт саласына көптеген жергілікті кадрлар келді. Жетпіс Нұрғалиев, Өсер Серікбаев, Жетпіс Ғұмаров, Октябрят Молдашев, Марат Испуллаев, Болат Әндіров, Сайын Құбаев, Бақытжан Көшекбаев, Ғасырбек Дауымов, Жеңіс Әмірханов, Алексей Горюнов, Ғабиден Қайыржанов, Марат Сисенов, Мағзом Құттыбаевтар жоғары білім алып, дене шынықтыру пәнінің мұғалімдері ретінде балалар мен жасөспірімдерді спортқа баулып, талай шәкірттерінің қанаттарын қатайтып, томағаларын сыпырды. Осы аға буынның жолын қуып Марат Ниғыметов, Әдебиет Ердешов, Есенғабыл Рамазанов, Айдынғали Жүнісов, Төремұрат Сисенғалиевтер қатарларын лайықты толықтырды.

Тәуелсіздікпен бірге аудан спортының тағы бір жарқын кезеңі басталды. 2000 жыл аудан тарихына алтын әріптермен жазылды. Құрманғазы ауданының түлегі, Арсен Хатип тұңғыш рет спорттық бәсекеде әлемдік деңгейге көтерілді. 2000 жылғы Испанияда, 2001 жылғы Молдавияда өткен самбодан жасөспірімдер арасындағы әлем чемпионатының жеңімпазы. 2002 жылы Будапештте (Венгрия) өткен жасөспірімдер арасындағы әлем кубогінің иегері. 2002 жылғы Якутиядағы өткен жастар арасындағы дзюдодан Азия чемпионатының жеңімпазы. Астана қаласында 2006 жылы өткен ересектер арасындағы самбодан әлем чемпионатының күміс жүлдегері атанды.

Кейінгі кездері түрлі халықаралық, республикалық жарыстарда жасындай жарқырап жүрген танымал спортшыларымыз жеткілікті. Жас кезінен мамандар назарына іліккен талантты боксшы Құрамысов Бекболат бокстан «Қазақстан Республикасының халықаралық спорт шебері». Азия чемпионатының қола жүлдегері, студенттер арасындағы әлем чемпионатының финалисі болды.

Құрманғазы Мерей бокстан «Қазақстан Республикасының спорт шебері» нормативін орындап, бүкілқазақстандық жастар ойындарының, ірі-ірі халықаралық турнирлерде жүлделерге ілікті. Ниғметов Мирас Атырау облысының құрамасы сапында өнер көрсетеді.

Таэквондодан да Нұрбаев Бейбарыс, Рудыкин Виктор, Ғайниев Мерген сынды таланттар шоғыры өсіп жетілді. Мерген 2018 жылы Павлодар қаласында өткен жастар арасындағы ел чемпионатында топ жарды. «Қазақстан Республикасы спорт шебері» атанып, әлем біріншілігіне қатысты, клубаралық 6-шы Европа чемпионатында күміс медальді қанжығасына байлады.

Қонашев Нұртілек панкратионнан «Халықаралық дәрежедегі спорт шебері», 2015-2016 жылғы әлем чемпионатының 2 дүркін күміс жүлдегері. Қазақстан чемпионы, түрлі халықаралаық турнирлердің жеңімпазы. Бралин Ерсейіт грепплингтен «Қазақстан Республикасының спорт шебері», ел чемпионатының күміс жүлдегері. Бесаспап спортшы білек күшін сынасудан, экстремалды спорт түрлерінен өткен сайыстарда олжа салып жүр.

А.НӘЖІМОВ.