Сертификат – қолда, табыс – алда!

Аудан тынысы

«Атамекен» Ұлттық Кәсіпкерлер Палатасы Құрманғазы аудандық филиалының ұйымдастыруымен сәуір айынан бастап кәсіпкерлерді қолдауға бағытталған «Бастау Бизнес» жобасы іске қосылды.

Жобаның мақсаты – ауыл тұрғындарына кәсіпкерлік негіздерін оқыту, оның ішінде ауыл шаруашылығы кооперативтерін құру, бизнес-жобаларды сүйемелдеу қағидаларын үйрету, ауыл тұрғындарының экономикалық белсенділігін арттыру. Бірінші топтың оқуы аяқталып, сертификат беру рәсімінде «Атамекен» ҰКП аудандық филиалының басшысы Ұлыбек Өтегенов:

- Ауданымызда жүзеге асқан жобада бірінші топта 44 адам кәсіпкерлік бағытында білім алуға ниет білдірді. Бүгінде оның 25-і өз бизнес жобаларын сәтті қорғап шықты. Қатысушылар қолданыстағы бизнес кәсібін ашуға, кеңейтуге немесе ауыл шаруашылығы кооперативтерін құруға толықтай мүмкіндігі бар. Сертификаты мен бизнес жобасы қорғалған азаматтар өз қаражаттарына немесе 6 пайыздан басталатын жеңілдетілген ауыл шаруашылық және ауыл шаруашылығы емес бағыттардағы несиеге қол жеткізеді.

Сондықтан, оқуға қатысқан кәсіпкерлерімізге мемлекет тарапынан берілген үлкен қолдаудан құр қалмай, алған несиенің мақсатты жұмсалуына мән беріңіздер, - деп, бизнес жобасын қорғағандар мен оқуға қатысқандар үшін арнайы сертификаттарын табыстады. «Жұмыспен қамту - 2020» орталығының директоры Базарбай Өтеулиев «Бастау бизнес» жобасы жас кәсіпкерлерге көрсетілген тамаша мүмкіндік екендігін алға тартып, бүгінгі күні осы І топта білім алғандардың ішінен 5-еуі несиеге қол жеткізгенін, алдағы уақытта олардың санын арттыруға жұмыстану қажеттігін тілге тиек етті. Оқу барысында бизнес-жобаны комиссия алдында қорғауға үлкен септігін тигізетін көпшіліктің алдында сөйлеу машығы да үйретілген болатын. Бұл бағытта Астанадан арнайы келген бизнес-тренер Серік Құмар өз жұмысын сәтті ұйымдастыра білді. Әр қатысушының мүйізді ірі қара өсіру, түйе, жылқы шаруашылығын дамыту немесе шағын және орта бизнесті кеңейту бағытында өзіндік жобалары бар.

А.ШАКУПОВА.